Kiyevde, fevral 23 künü, Rusiye elçihanesi yanında Qırımdan köçip kelgenler Qırım işğaline ve Rusiyeniñ insan aqları boyunca siyasetine qarşı narazılıq numayışını keçirdiler.
Qırım.Aqiqat mühbiri aytkanı kibi, «Qırım – Ukrainadır» aktsiyasınıñ teşkilâtçıları «Almenda» ve «Qırımdan mecburen köçip kelgenlerniñ teşkilâtlarını idare şurası» teşkilâtları oldı.
Aktsiya iştirakçileri Rusiye ordularınıñ Qırımğa kirmesini aks etken fotolar ile plakatlarnı ketirip, elçihaneniñ isarına astılar. Levhalarda «accupant/aggressor» kibi yazılar bar edi.
«Almenda» merkeziniñ başı Olga Skripnik aytqanı kibi, işbu numayış Rusiye ordularınıñ yarımadağa kirmesiniñ yıllığına bağışlana.
«Rusiye ordularınıñ Qırımdan çıqmasını, siyasiy mabüslerniñ azat etilmesini ve Qırımda insan aqlarına riayet etilmesini talap etemiz», – dedi o.
Aktsiyanıñ diger iştirakçisi – «Ukrain evi» Qırımnıñ iş ve medeniyet işbirligi merkezi» cemaat teşkilâtınıñ reisi Andrey Şçekun fevral 23 kününden Rusiyeniñ Qırım işğali yıllığına bağışlanğan afta başlağanını bildirdi.
Onıñ aytqanına köre, yaqın vaqıtta Ukraina Nazirler Kabinetinde bu mevzuğa bağışlanğan toplaşuv başlanacaq. Bunıñ ile fevral 28 künü Kiyev merkezinde Qırım işğaline qarşı kütleviy tedbirler keçecek.
«Aktsiyamızınıñ maqsadı – Qırımnı kün tertibine qaytarmaq, Qırım mevzusı matbuat vastlarında ve akimiyette birinci yerde omlalı», – dedi o.
Rusiyeniñ Qırım işğaline bağışlanğan «Qırım – Ukraina» aktsiyası martnıñ 15-ne qadar sürecek.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
