Ukrain katolik universitetinde qırımtatar studenti içün 32 biñ grivna miqdarında stipendiya tesis etildi. Stipendiya namzeti 2015-2016 oquv seneleri belli olacaq.
Bunı aliy oquv yurtunıñ matbuat hızmeti bildire.
«Stipendiya şimdi zor vaqıtlarnı yaşağan ve öz itibarı, serbestlik ve aqiqat içün küreşken qırımtatar yaşlarına qol tutmaq içün kirsetile», – denile beyanatta.
Stipendiya namzeti bakalavr/magistr programmaları boyunca oquvğa 100% endirimni elde etecek.
Stipendiyanıñ berilmesi aqta qararnı prorektor ve ocalardan ibaret olğan yarış komissiyası alacaq.
Malüm olğanı kibi, stipendiyağa para Kiyevde bıltır dekabr ayında keçirilgen Ukrain katolik universitetiniñ VII hayriye aqşamı çerçivesinde toplanıldı. Bunı ukrain caz ve opera yırcısı, qırımlı Camala, qırımtatar ressamları Rustem Skibin, Elmira Seit Ametova, Mamut Çurlu, Eldar Güsenov ve universitetke öz eserlerini bağışlağan diger hayırseverlerniñ yardımı ile becerdiler.
