Link açıqlığı

Kiyevde bu raatlıq künleri qırımtatar medeniyetine bağışlanğan sergi keçirildi. Mında resimler, keramika, qırımtatar halqına bağışlanğan video taqdim etildi, haber ete 5 kanal.

Sergide yarımadada işğalci akimiyet tarafından yasaq etilgen şeyler kösterildi.

Şu cümleden, mında evelleri ATR qırımtatar telekanalında kösterilgen «Qırım hanlığınıñ altın devri» leyhalarıdan alınğan video taqdim etildi. Rusiye Qırımnı işğal etkeninden soñ, siyasiy sebeplerden bu malümatnı köstermege imkân yoq oldı, dep añlata müellif Gülnara Abdullayeva.

Yarımadadan Rusiye mahsus hızmetleri tarafından sürgün etilgen qırımtatar faali Sinaver Kadırov bu kibi tedbirlerniñ emiyetli olğanını qayd etti.

2014 senesi fevralniñ soñunda – martnıñ başında Rusiye ve Rusiyeniñ Qara deñiz flotunıñ qırım bölüklerinden ordular Qırım yarımadanı zapt ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

XS
SM
MD
LG