Qırımtatar Milliy Meclisiniñ tış alâqa bölüginiñ reberi Ali Hamzin akimiyet ile keçirilgen körüşüvde Qurultay keçirilecek künü muzakere etilmegenini bildirdi.
«Qırımtatar Milliy Qurultayınıñ keçirilecek tarihı aqqında işbu körüşüvde laf yoq edi… Bu körüşüvge davetli olğanlarnıñ sırasında edim, dialog meselesi boyunca Rusiye akimiyeti işbu ketişatnı QMC Yuqarı Şurasınıñ 2014 senesi mart 11 künü alğan «Qırımtatar halqınıñ aq-uquqlarınıñ pekitüv kefaleti ve onıñ Qırım toplulığına qoşulması aqqında» vesiqası temelinde devam etmek imkâniyetini qayd ettim. Bunıñ ile Meclis azalarınıñ «toplaşuvı»nda «Qurultaydan evel Meclis reisi vazifelerini eda etecek şahısnı saylamaq» imkân olmağanını qayd ettim», – yazdı o Facebook saifesinde.
O, «iç kimse Meclisni mecburen «idare etmege» tırışmağanı»ndan öz memnüniyetini bildirdi.
Akimiyetke yaqın olğan Krıminform saytı Qırımtatar Milliy Meclis azalarınıñ akimiyet vekilleri ile körüşüvi aqqında bildirgen edi. Körüşüvden soñ spiker muavini Remzi İlyasov Qurultay kününi belgileycek Meclis toplaşuvınıñ olacağı aqqında bildirdi.
Qırım.Aqiqatqa bergen izaatında Meclis reisinin muvaini Nariman Celâl Qurultaynıñ keçirilmesi aqta qarar Meclis toplaşuvında alınmaq kerekligini qayd etti, buña ise kvorum yoqtır.
