Link açıqlığı

Qırım Devlet Şurasınıñ spiker muavini Remzi İlyasov yaqın zamanda Qırımtatar Milliy Meclisi toplaşıp, Qurultay keçirilecek tarihını belgileycegini qayd ete. Bunı o, akimiyet tarafdarı olğan Krıminform saytına Meclis azaları ile Qırım nazirler Şurasında olğan eki saatlıq körüşüvinden soñ bildirdi.

«Azalarnı Meclis ögünde olğan meselelerni ve müim problemlerni muzakere etmek içün körüşüvge davet ettim. Küçümizni halq meseleleriniñ çezilüvine sarf etmek kerekliginde fikirlerimiz bir oldı. Bugün Meclisniñ on azası qırımtatarlarnıñ meseleleri üzerinde birlikte çalışmağa razı oldı ve Meclisniñ diger azalarını da, şahsiy kibirni çetke taşlap, halqnıñ taqdirinde iştirak etmege çağırdılar», – dedi İlyasov.

Onıñ sözlerine köre, körüşüvde bulunğan Meclis azaları Meclis reisiniñ muavini Ayder Acimambetovnıñ işbu vaziyetni ögrenmek ve Qurultaynıñ keçirilecek kününi belgilemek içün toplaşuvnı keçirmege teklifi ile razı oldılar.

«Yaqında Meclis toplaşuvında Qurultaynıñ keçirilecek tarihını muzakere etermiz», – dedi İlyasov.

Qırım.Aqiqat spiker muavini ile bağlanacaq oldı, amma o cevap bermey.

Qırımtatar Milliy Meclisinde Qırım.Aqiqatqa Meclis azalarınıñ Nazirler şurası binasında keçirilgen körüşüvde iştirak etkenini tasdiqladılar. Aynı zamanda mında Qurultaynı toplamaq içün imkânnı şimdilik körmeyler. Bu aqta qarar Meclis toplaşuvında alınmalı, şimdi ise kvorum yoqtır.

«Biz qaidelerge riayet etmelimiz. Qurultaynı çağırmaq içün, Meclisni toplamaq kerek, buña ise kvorum kerek, eñ azından 20 insan, o vaqıt meselelerni muzakere etmege mümkün olur. Şimdi kvorumnı toplamağa imkân yoq, şunıñ içün Meclisniñ bazı azaları özlerine ve zenaatdaşlarına nisbeten olğan bazı qorqularını bildire. Kvorum olsa edi, Meclis toplaşuvı da keçirilir edi», – tarif etti Qırım.Aqiqatqa Meclis reisiniñ muavini Nariman Celâl.

Bundan evel Meclis azası İlmi Ümerov zenaatdaşlarını Qırım akimiyeti ve terkibinde olğan qırımtatarlarnıñ Meclisniñ yolbaşçılığını deñiştirmek teklifine razı olmamağa çağırdı. Qırımtatarlarnıñ temsiliy organı reisi vazifesine Remzi İlyasovnı tayinlemek isteyler.

XS
SM
MD
LG