Salı künü, fevral 17-de, Krasnodarda qırımtatarlarnıñ milliy yetekçisi, Ukraina prezidentiniñ qırımtatar halqınıñ işlerinden vekâletlisi Mustafa Cemilеvniñ oğlu Hayser Cemilevniñ işi boyunca mahkeme toplaşuvı üçünci kere avuştırıla.
Rusiye matbuat vastaları bildirgeni kibi, mahkeme toplaşuvı kene başqa künge keçirildi – adliyeci Nikolay Polozov işniñ 11 cıltından tek yarısı ile tanış oldı.
Mahkemeci Vladimir Kоbzev mahkeme toplaşuvını daa bir aftağa qaldırdı. Ketişat fevral 24 künü başlanacaq.
Rusiye Qırımnı işğal etkende, Mustafa Cemilevniñ oğlu Hayserni, İnsan aqları boyunca Avropa mahkemesiniñ Hayser Cemilevni azatlıqqa yollamağa talabına baqmadan, Krasnodar diyarınıñ SİZOsına alıp kettiler.
Hayser Cemilevni 2013 senesi mayıs 27-de Bağçasaraydaki evniñ azbarında yaqaladılar. O, 44 yaşında Fevzi Edemovğa qarşı ateş açıp, onı öldürdi.
Militsiya Cinayi kodeksiniñ 115-inci maddesi 1 qısmı (aselet öldürüv) boyunca cinaiy iş açtı. Mecliste bunı muqaytsızlıq sebebinden öldürüv dep adlaylar. Aqmescitniñ Kiyev rayon mahkemesi Hayser Cemilevni apske almağa qarar berdi.
Qırım işğalinden soñ taqiqat organları onıñ işini ğayrıdan ögrenmege istediler. Bu arada Kiyevniñ Apellâtsion mahkemesi Hayserniñ areketlerini muqaytsızlıqtan öldürüv olaraq tanıp, onı azat etüv aqqında qarar aldı. İnsan aqları boyunca Avropa mahkemesi Cemilevniñ oğlunı azat etmege çağırdı. Lâkin Rusiye buña qulaq asmay.
