Birleşken Milletler Teşkilâtında Almaniyanıñ daimiy temsilcisi Harald Braun onıñ memleketi Rusiye tarafından Qırım işğalini takbih etkenini hatırlattı.
Bunı o New Yorkta BMT Havfsızlıq Şurası Ukraina vaziyeti boyunca beyannameni qabul etkeninden soñ bildirdi, haber ete UNİAN.
«Qırımnıñ qanunsız işğalini takbih etkenimizni daa bir kere qayd etmek isteyim, biz onı tanımaymız», – dedi Braun.
Onıñ aytqanı kibi, salı künü qabul etilgen beyannamede qayd etilgen Ukraina topraq bütünligi halqara seviyede tanılğan sıñırlar çerçivesinde kele.
Evel bildirilgeni kibi, Qırım işğali aqqında toplaşuvda Ukraina temsilcisi Yuriy Sergeyev de aytqan edi.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
