Santıraç boyunca dünya çempionı ve cemaat erbabı Garri Kasparov Ukraina prezidentiniñ qırımtatarlarnıñ işlerinden vekâletlisiniñ ükümeti tarafından kelecek aftağa planlaştırılğan Qırım meselesi boyunca tedbirlerde iştirak etmege razı oldı.
Bunı Mustafa Cemilevniıñ matbuat hızmeti bildire.
«Bizge İnsan aqlarını qoruv fondunıñ halqara şurasınıñ reisi Garri Kasparov cevap berdi: «Gönlüm siznen, ebet, tedbiriñizde yardımcı olmağa ya da izaatlarımnı bildirmege pek ister edim. Sizge işbu al etici küreşiñizde muvafaqiyet tileyim. Qırım – Ukrainadır! », – dep bildire Kasparovnıñ sözlerini Ukraina prezidentiniñ qırımtatarlarnıñ işlerinden vekâletlisiniñ matbuat hızmeti.
Kelecek tedbirler aqta daa da tafsilâtlı malümat birazdan peyda olacaqtır.
Qırım.Aqiqat haber etkeni kibi, Qırımnıñ işğali yıllığına Kiyevde tögerek masa ötkerilecektir, bunıñ teşebbüsçisi – Ukraina Yuqarı Şurasınıñ «Qırım» firqalarar deputat birligidir.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
