Ukraina baş naziri Arseniy Yatsenükni «Qırım Muhtar Cumhuriyetiniñ işğali yıllığına» keçirilecek tögerek masa toplaşuvına çağıralar. Toplaşuv Kiyevde Ukraina Yuqarı Şurasınıñ «Qırım» firqalarara deputat birliginiñ teşebbüsi ile keçirilecek.
Bu aqta Ukraina halq deputatı, «Qırım» birliginiñ reisi Aleksey Gonçarenkonıñ Nazirler kabinetiniñ başına yollanılağan muracaatında aytıla.
«Sayğılı Arseniy Petroviç, sizge, Ukraina baş naziri olaraq, mezkür tögerek masa işine qoşulmağa rica etem», – denile muracaatta.
Vesiqada tedbir iştirakçleriniñ yüksek seviyesi qayd etile – Ukraina devlet ve yerli akimiyet organlarınıñ yolbaşçı ve hadimleri, Ukraina halq deputatları, Ukrainada çetel devletlerniñ elçihane temsilcileri ve ilâhre.
Baş naziriniñ musaadesi ile tögerek masanı mart 10 künü 10:00-13:00 saatler arasında Ukraina Nazirler Kabineti klubınıñ İnstitutskaya, 7 adresi boyunca yerleşken binasında keçirmege planlaştıralar.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
