Link açıqlığı

Meclis: Noman Çelebicihannıñ hatırasına tedbirlerniñ Aqyarda keçirilmesi – sual işareti altında


Qırımtatar Milliy Meclisi Qırımnıñ şimdiki akimiyeti ile qırımtatar erbabı Noman Çelebicihannıñ hatırasına bağışlanğan tedbirler keçirilmesini muzakere etmekte, lâkin planlaştırılğan merasimlerniñ episi ötkerilecekmi-yoqmı daa belli degil. Bunı Meclis reisiniñ muavini Nariman Celâl Qırım.Aqiqat mühbirine bildirdi.

«Aqyarda ananeviy miting keçirilmesine akimiyet qarşı çıqa, çünki fevral 23-te Rusiyede Vatan imayecisiniñ künü qayd etile – bayram künü, adamlar eglene, er kesniñ keyfi farqlı, er vaqıt yahşı olmay», – dedi o.

Fevral 22-de Qırımnıñ Küreş Federatsiyası Noman Çelebicihannıñ hatırasına yarışnı teşkil ete, Bağçasaraynıñ Hanlar sarayında ise matem mitingi keçirilecek. Fevral 24-te Qırım müendislik pedagogika universitetinde hatıra aqşamı ötkerilecektir.

Malüm olğanı kibi, Qırım camilerinde qırımtatar erbabı, Qırım, Poloniya, Aqrusiye, Litvaniya musulmanlarınıñ müftisi Noman Çelebicihannıñ hatırasına dua merasimleri keçirilecek.

Noman Çelebicihan 1885 senesi molla qorantasında doğa. Bağçasaray, İstanbul, Sankt-Peterburgda oquy, qırımtatar yaşlarınıñ maarif ve inqilâbiy teşkilâtlarında iştirak ete. 20-nci asırnıñ başında eñ istidatlı qırımtatar edebiyatçısı olaraq tanıla. Qırımtatarlarnıñ milliy gimniniñ müellifidir. 1917 senesi Fevral inqilâbından soñ Musulman icraiy komitetiniñ reisi, Qırım müftisi – soñra ise Birinci Qırımtatar Milliy Qurultayınıñ reisi ola. 1918 senesi yanvar ayında bolşevikler tarafından yaqalana, fevral 23 künü apiste deñizciler tarafından öldürile. 33 yaşında olğan müftiniñ cesedi deñizge atıla.

XS
SM
MD
LG