Qırım camilerinde qırımtatar erbabı, Qırım, Poloniya, Aqrusiye, Litvaniya musulmanlarınıñ müftisi Noman Çelebicihannıñ hatırasına dua merasimleri keçirilecek.
Bunı Qırım Musulmanları Diniy idaresiniñ matbuat hızmeti bildirdi.
«Cami imamları hutbelerinde qırımtatar halqınıñ ulu oğlunıñ ömür ve faaliyeti aqqında tarif etecekler», – denile beyanatta.
Dualar camilerde fevral 20 künü cuma namazından evel oqunacaq, başlanuvı saat 12:30.
Qırım.Aqiqat bildirgeni kibi, fevral 23 künü Aqyarda Noman Çelebicihanğa bağışlanğan tedbirler keçirilecek. Aqyar regional meclisinde buña akimiyet musaadesi endi bar olğanını bildireler.
Noman Çelebicihan 1885 senesi molla qorantasında doğa. Bağçasaray, İstanbul, Sankt-Peterburgda oquy, qırımtatar yaşlarınıñ maarif ve inqilâbiy teşkilâtlarında iştirak ete. 20-nci asırnıñ başında eñ istidatlı qırımtatar edebiyatçısı olaraq tanıla. Qırımtatarlarnıñ milliy gimniniñ müellifi ola. 1917 senesi Fevral inqilâbından soñ Musulman icraiy komitetiniñ reisi, Qırım müfisi – soñra ise Birinci Qırımtatar Milliy Qurultayınıñ reisi ola. 1918 senesi yanvar ayında bolşevikler tarafından yaqalana, fevral 23 künü apiste deñizciler tarafından öldürile. 33 yaşında olğan müftiniñ cesedi deñizge atıla.
