Moskvanıñ Basman mahkemesinde fevral 12 künü Mustafa Cemilevniñ oña işğal etilgen Qırımğa kirişni beş yılğa yasaq etken Federal Migratsion hızmetine davası boyunca toplaşuv keçirilecek.
2014 senesi mayıs başında Qırımnıñ Rusiye akimiyeti qırımtatarlarnıñ milliy yetekçisi Mustafa Cemilevni yarımadağa kirsetmedi. Oña Rusiye territoriyasına kiriş yasaqlığı ilân etildi. Cemilev uzun vaqıt devamında Qırımtatar Milliy Meclisiniñ reisi edi. 2013 senesi reis vazifesine Refat Çubarov başladı. Qırım Rusiyege qoşulğanından soñ ekisine de cumhuriyet kirişi yasaq etildi: region akimiyetiniñ olarğa olğan iddiası – milletlerara ziddiyetniñ doğurmasıdır.
Aynı şu yasaqqa Mustafa Cemilev Rusiye mahkemesinde itiraz bildirmege areket ete. Onıñ menfaatını adliyeci Mark Feygin qorçalaycaq. Feyginniñ aytqanı kibi, imaye mevzimi yalıñız uquqiy temelinde qurulacaq, amma, adliyeciniñ qayd etkenine köre, bu işniñ ciddiy bir siyasiy negizi bardır.
Mustafa Cemilevniñ vaziyeti ve onıñ Rusiye Federatsiyası territoriyasına «milliy havfsızlıq sebebinden» kiriş yasaqlığı dos-doğru siyasiy mesele olğanı bellidirMark Feygin
«Mustafa Cemilevniñ vaziyeti ve onıñ Rusiye Federatsiyası territoriyasına «milliy havfsızlıq sebebinden» kiriş yasaqlığı doğrudan-doğru siyasiy mesele olğanı bellidir. Çünki başqace bunı añlatmaq çare yoqtır. Bu er şey Qırım toprağı işğal etilgen vaqıtta yüz berdi. Cemilev, Ukraina Yuqarı Şurasınıñ deputatı olıp, bu işğalge qarşı çıqqan edi, bundan da ğayrı, o, qırımtatar halqını temsil ete ve onıñ yetekçisi ola, er ceetten. Mustafa Cemilev sabıq disiidenttir, şunıñ içün mahsus hızmetleriniñ oña nisbeten siyasiy allergiyası bardır. Qırımda ise idare etken – mahsus hızmetlerdir. Cemilevge Qırım toprağına kiriş yasaqlığı aqqında qarar acele, Kreml emri ile, alınğan edi, şunıñ içün uquqnıñ yañlış qullanılmasından bir sıra eksiklik peyda oldı. Şunı añlamaq kerek ki, Cemilev ilk evelâ evine, apayı, eki oğlu olğan yerge, kelmege istey. Oğullarından biri, hatırlatam, Krasnodar diyarında apiste buluna. Şunıñ içün, şübesiz, bu işniñ siyasiy negizini körem, amma uquq qaidelerinden faydalanacağım, biz bu işni siyasetleştiremiz degen qabaat olmasın, dep. Amma bütün bu meselelerniñ siyasiy olğanı ep aqlımızdadır», – dedi adliyeci.
Mark Feygin şunı da qayd etti ki, Rusiyede adalet olğanına pek te inanmay. Amma Mustafa Cemilevniñ işinde daa bir emiyetli noqta bar ki, netice menfiy olsa bile, qırımtatarlarnıñ yetekçisi Avropa mahkemesine muracaat ete bilecek, bunı «Moskovskiy komsomolets» gazetasınıñ baş muarrir muavini Ayder Mujdabayev bildirdi.
Mustafa Cemilev qırımtatar halqınıñ Qırımğa avdeti oğrunda küreşniñ timsalidir. Şunıñ içün Rusiyede keçirilecek mahkeme – timsaliy bir şeyAyder Mujdabayev
«Mustafa Cemilev halqımıznıñ Qırımğa avdeti oğrunda küreşiniñ timsalidir. Şimdi olayatqan adiseler, bu, ebet, Mustafağa ve endi Vatanğa kiriş yasaq etilgen diger qırımtatarlarğa nisbeten ayırım siyasetidir. Şunıñ içün Rusiyede keçirilecek mahkeme – timsaliy bir şey. Cemilevge Qırımğa kirişni açarlar degen fikirde degilim. Amma bilem ki, Mustafa Cemilevge şimdi mahkemeniñ er türlü qararını elde etmege müimdir. Soñra o, Avropa mahkemelerine muracaat ete bilecek. Çünki Mustafa Cemilevge kiriş yasağı aqqında bildirilgende, eline iç bir vesiqa berilmedi.
Mustafa Cemilev yigirmi yıl devamında reislik yapqan Qırımtatar Milliy Meclisinde Rusiye akimiyetiniñ mevamını tenqit eteler ve Cemilevniñ statusı aqqında qararnı siyasetçiler degil de, adliyeciler almaq kerek olğanını bildireler.
