«Temel» neşriyatı ilk sefer Kiyevde Qurannıñ ukrain tercimesini neşir etecek.
Bunı neşriyatnıñ matbuat hızmeti bildire.
Tercime üzerinde tarih ilimler namzeti, terciman ve taqiqatçı Mıhaylo Yakuboviç beş yıl devamında çalışqan edi. Kitap mart ayında dünya yüzü körecek.
«Ukrainada arap tilinden etilgen tercime yoq edi, yalıñız qısımları, amma olar da kerekli qadar doğru degil edi. İslâm diniy leksikası üzerinde uzun vaqıt çalıştım, ukrainliler içün adiy, amma aynı zamanda asıl nushanıñ doğru manasını aks etken sözlerni qıdıra edim», – dedi Yakuboviç.
Resmiy malümatqa köre, Ukrainada yarım million musulman yaşay, amma naşirlerniñ fikrine köre, bu kitap er bir ukrain içün emiyetlidir.
Quran-i Kerim – 14 asır evelsi yazılğan musulmanlarnıñ muqaddes kitabıdır. 114 süreden ibaret, er bir süre ayetlerge bölüne. Quranda 6204-6236 ayet, 320 biñden ziyade arif bar. Musulmanlarnıñ yaşayış qaideleriniñ bir toplamıdır.
