Link açıqlığı

Bağçasaray rayon istimal birliginiñ paycıları üç kün devamında ücümge qarşılıq köstere. Politsiya bir şey yapmay


Bağçasaray rayon istimal birliginiñ paycıları

Bağçasaray rayon istimal birliginiñ paycıları ve binanı elge keçirmege istegen insanlar arasında qarşılıq endi üç kün devam ete.

Qırım.Aqiqatqa Bağçasaray rayon istimal birligi şurasınıñ reisi Margarita Levaşkina aytqanı kibi, binanı tosmenge tutqan insanlar, «halq imayesi» vekilleri olması mümkün, özlerini qaba ve sert alıp baralar.

«Rezil ete, aşalaylar. Kabinetimni tosmenge tutqanlar, amma biz oña sürip kirdik. Erkeklerni binağa kirsetmeyler. Aqşamdan nevbette turğan adamlar mındadır. Politsiya bugün keldi, amma bir şey yapmay, ayatta otura», – dep tarif etti o.

Levaşkinanıñ malümatına köre, «halq imayesi» vekilleri ketirgen vesiqalarda Bağçasaray rayon istimal birligi endi «Qırım ticariy şirketiniñ» qısmı olaraq belgilegendir.

«Yañı müdirniñ tayinlenmesi aqta emirni ketirdiler. Amma oña kimse diqqat etmey. Er kes yerinde qala. Kimse işlemey. Vaziyet pek kergin, soñu ne olur, bilmeyim», – dey qadın.

Bağçasaray rayon istimal birliginiñ yolbaşçıları bildirgeni kibi, şeer akimiyeti alâ daa işbu adisege seslenmedi.

Bağçasaray rayon istimal birliginiñ bölüginde fevral 2-den tayaqları olğan maskalı ve «Qırım arslanları» belgileri ile insanlar tura.

Fevral 3 künü paycılar toplanıp, bina kirişi üzerinde nezaretni qautarıp oldılar. Mında bunı qanunsız zapt etüv olaraq tanıylar.

XS
SM
MD
LG