Qırımtatar Milliy Qurultayınıñ Teftiş komissiya reisi Ali Özenbaş Qırımtatar Milliy Meclis azaları ve faallerge qarşı suniy qararlarnı çıqarğan mahkemeciler kelecekte özleri halqara mahkemelerine tüşe bilecek, dep tüşüne.
Bunı o Qırım.Aqiqat saytına bildirdi.
Onıñ fikrine köre, Meclis reisiniñ muavini Ahtem Çiygoznıñ yaqalunvından soñ «bu kibi qanunsızlıq ve munasebetke qarşı» narazılıqlarnıñ sayısı ğayet arttı.
«Birleşken milletler teşkilâtı, Avropa birligi, em de diger memleketlerniñ ükümet başlarına mezkür işlerniñ halqara mahkemelerinde, şu cümleden İnsan aqları boyunca Avropa Mahkemesinde baqılması ve cinaiy icracı ve emir etkenlerniñ cezalarını bere bilecek Halqara tribunalnıñ teşkil etilmesi boyunca talaplarnı beklemek kerek. Böyle alda ise, bu kibi repressiyalarnıñ aqibetlerini esapqa alsaq, er bir muayyen şahısnı belgilemek ve eñ qattı şekilde cezalamaq kerek», – dep tüşüne Ali Özenbaş.
Akimiyetniñ 2014 senesi fevral 26 künü kütleviy tertipsizlikni teşkil etüvde qabaatlanğan Ahtem Çiygoznı on yılğa apiske qapatmaq kibi qorquzuvını Meclis azası 1919 senesi vatandaşlıq cenki vaqtında Denikin akimiyetiniñ areketleri ile qıyaslay.
«O zaman vatandaşlıq cenkiniñ eñ kergin vaqıtlarında arbiy-alan mahkemeleri mabüs bolşeviklerni çeşit katorgalarğa yollay edi, amma aynı zamanda olarnıñ şahsiy kelecegi ise belgisiz edi», – dey Ali Özenbaş.
Yanvar 19 künü «mayıs 3 künü işi» boyunca Edem Osmanov yaqalana. Yanvar 23-de «Ermeni Bazar» kiriş noqtasında Federal Havfsızlıq Hızmeti ve Rusiye sıñır hızmeti faali Sinaver Kadırovnı yaqalap, Qırımdan sürgün eteler. Yanvar 29 künü Qırımtatar Milliy Meclis reisiniñ vazifelerini eda etken Ahtem Çiygoz apiske alına. Bundan soñ evinde tintüv keçirile. Bundan evel tintüv ATR qırımtatar telekanalında keçirile.
Qırım akimiyetini yarımada tamır halqına nisbeten ayırımnı toqtatmağa çağıralar, amma Qırım «ükümeti» qırımtatarlarğa etilgen basqını tanımay.
