Link açıqlığı

Qırımda Amet Han Sultan hatırasına küreş yarışı keçti


Fevral 1 künü Qurman rayonı Büyük Onlar qasabasında Sovet Birliginiñ eki defa qaramanı, nam qazanğan sınavcı-uçucı Amet Han Sultan hatırasına VI Cumhuriyet boyunca gençlerara küreş yarışı keçti. Tedbirge qaramannıñ eki doğmuş qardaşı Nebi Sadlayev da keldi, haber ete Qırım.Aqiqat mühbiri.

«Yaş balalar şimdi sport salonında buluna, diger yerlerde degil, menimce, bu büyük bir iştir. Qorantamızdan bütün iştirakçi ve teşkilâtçılarğa minnetdarlığımıznı bildirem»,– dedi Nebi Sadlayev.

Yarışta Büyük Onlar, Aqmescit, Saq, Kezlev, Seitler ve Qırımnıñ diger meskün yerlerinden genç sportçular iştirak etti. Ğaliplerge medal, kup ve degerli bahşışlarnı ediye ettiler.

Tedbir çerçivesinde Medeniyet evinde qırımtatar qaramanına bağışlanğan sergi de azırlanğan edi.

Amet Han Sultan (1920-1971) – Sovet Birliginiñ eki defa Qaramanı, SSCB nam qazanğan uçucısıdır. Ekinci cian cenkiniñ iştirakçisi, uçucı-qırıcı 603 arbiy uçuşnı keçirdi, öz başına 30 uçaqnı, taqım terkibinde 19 uçaqnı urıp tüşürdi. Cenkten soñ sınavcı uçucı olaraq çalıştı. Sınav uçuşında elâk oldı.

XS
SM
MD
LG