Link açıqlığı

Ali Hamzin: Çiygoznıñ işi aqqında: akimiyetniñ maqsadı – qırımtatarlarğa yarımadanı terk ettirmektir


Qırımtatar Milliy Meclisiniñ reis muavininiñ apiske alınması ve evinde tintüv keçirilmesi – akimiyetniñ tamır halqnı qorquzmaq ıntıluvıdır, dep ayttı Qırımtatar Milliy Meclisiniñ tışqı alâqalar bölüginiñ reberi Ali Hamzin. O, Çiygoznıñ tintüv keçirilgen Bağçasaraydaki evi yanında buluna.

«Bu iş beyaz yipler ile tikildi. Olmaycaq bir qabaat. 2014 senesi fevral 26-da Qırımda ukrain akimiyeti bar edi, Qırım Yuqarı Radasınıñ binasında ise Ukraina bayrağı dalğalana edi. Biz Ukraina qanunları boyunca yaşağan edik. Ve men Rusiye akimiyetiniñ yapqanlarını añlamayım, çünki o vaqıt Qırımda Rusiye yoq edi. Bu olmaycaq bir şeydir», – dedi o.

Ali Hamzin emin ki, Meclis vekilleri ve qırımtatarlarğa basqı devam etecek.

«Mence, qırımtatarlarğa basqı endi başlana. Olar merkeziy Meclis azalarını apiske almağa başlaycaqlar, soñra – yerli vekillerini, ileride ise – faal ve adiy adamlarnı. Bu akimiyetniñ maqsadı belli – halqımızğa yarımadanı terk ettirmektir, bizni qorquzmaqtır. Bu sebepten men provokatsiyalarğa qulaq asmamağa, qorqmamağa, ve Qırımdan ketmemege çağıram», – dep qayd etti Hamzin.

Ahtem Çiygoznıñ evinde tintüv yanvar 30-da yerli saatke köre saba saat 7-lerde başlandı. Taqiqat tedbirleri Rusiye Federatsiyası Cinaiy kodeksiniñ 212-nci maddesi 1-inci qısmı boyunca cinaiy iş («kütleviy numayışlarnıñ teşkil etilmesi») çerçivesinde keçirile.

Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.

Onıñ aytqanına köre, 2014 senesi fevral 26-da Aqmescitteki Qırım parlamentiniñ binası yanında keçirilgen narazılıq aktsiyası aqqında laf kete.

Aqmescitniñ Kiyev rayon mahkemesi Çiygoznı 2015 senesi fevral 19-na qadar apiste qaldırdı.

Qırımtatar Milliy Meclisiniñ reisi Refat Çubarov Çiygoznıñ yaqalanmasını izaatlap, Qırımda qırımtatar milliy areketiniñ faallerine yapılğan basqınıñ yañı basamağı başlanğanını ayttı.

XS
SM
MD
LG