Link açıqlığı

Yanvar 29 künü, cumaaqşamı, mahkeme qararı ile yaqalanğan Qırımtatar Milliy Meclis reisiniñ muavini Ahtem Çiygoz Taqiqat komitetiniñ idaresine sorğuğa ketmezden evel, reisniñ daa bir muavini Nariman Celâl ile körüşti.

Celâl aytqanı kibi, körüşüv kündüz saat 12:00 keçti. O vaqıt Çiygoz Franko caddesinde şahsiy körüşüvi olacağı aqqında bildirdi, haber ete Qırım.Aqiqat neşiriniñ mühbiri.

«Birazdan telefon etip, fevral 26 künü işi boyunca yaqalanğanını bildirdi. Biz, tabiiy ki, advokat ile bağlanıp, anda yol aldıq, Çiygoz ile bağ endi üzüldi», – dedi Nariman Celâl

Qırımtatar Milliy Meclisinde olıp keçken vaqianı qırımtatar milliy areket faalleri taqibiniñ devamı olaraq tanıylar.

«Uquq qoruyıcı organlarınıñ ölüm ya da yüz bergen diger vaqialarnıñ sebeplerini taqiq etmek aqqına qarşı çıqmaymız, amma işbu adise boyunca ğayet çoq sual ve añlaşılmamazlıq bar. Acele etkenleri de, başta Kiyev mahkemesinde işni baqacaq ediler, soñra Merkeziy, soñra kene de Kiyev mahkemesi. Fikrimizge köre, qarar pek acele alındı», – dedi Celâl.

Qırım.Aqiqat haber etkeni kibi, Aqmescitniñ Kiyev rayon mahkemesi Qırımtatar Milliy Meclisiniñ reis muavini Ahtem Çiygoznıñ cezasını belgilep, onı 2015 senesi fevral 19-na qadar apiske almağa qarar aldı

Ahtem Çiygoz yanvar 29-da yaqalandı. Rusiye Taqiqat komitetiniñ resmiy vekili Vladimir Markin bildire ki, Çiygoznı «kütleviy numayışnı teşkil etüv ve iştirak etüvde» şekleyler.

Onıñ aytqanına köre, 2014 senesi fevral 26-da Aqmescitteki Qırım parlamentiniñ binası yanında keçirilgen narazılıq aktsiyası aqqında laf kete.

Qırımtatar Milliy Meclisiniñ reisi Refat Çubarov Çiygoznıñ yaqalanmasını izaatlap, Qırımda qırımtatar milliy areketiniñ faallerine yapılğan basqınıñ yañı basamağı başlanğanını ayttı.

XS
SM
MD
LG