Link açıqlığı

İşğal etilgen Qırımda Qırımtatar Milliy Meclisiniñ liderlerinden biri Ahtem Çiygoz yaqalandı. Bunı Rusiye Taqiqat komitetiniñ resmiy saytı bildire. Çiygoznı «kütleviy numayışnı teşkil etüv ve iştirak etüvde» şekleyler.

«Qırım Cumhuriyeti boyunca Taqiqat komitetiniñ Baş taqiqat idaresiniñ taqiqat organları kütleviy numayışlarnı teşkil etüv ve iştirak etüv cinaiy işiniñ taqiqatı çerçivesinde Qırımtatar Milliy Meclisi cemaat teşkilâtınıñ liderlerinden biri Ahtem Çiygoz yaqaladı», – dep ayttı Rusiye Taqiqat komitetiniñ resmiy vekili Vladimir Markin.

İTAR-TASS agentligi bildire ki, 2014 senesi fevral 26-da Aqmescitteki Qırım parlamentiniñ binası yanında keçirilgen narazılıq aktsiyası aqqında laf kete.

2014 senesi fevral 26 künü yüz bergen çatışmalar
2014 senesi fevral 26 künü yüz bergen çatışmalar

«Yañlış areketler yapıp, toplaşqan adamlarğa da aynısını yapmaları içün örnek köstergeninden sebep kütleviy çatışmalar yüz berdi, «Russkoye Yedinstvo» areketi ve Qırım Cumhuriyetiniñ samooboronasınıñ vekillerine qarşı küç qullandı, mal-mülk zarar kördi ve yoq etilgen edi», – dep ayttı Markin.

Markinniñ bildirgenine köre, «aktsiya iştirakçileriniñ bir qısmı Qırım Muhtar Cumhuriyetiniñ Yuqarı radası binasına kirip, mal-mülkke 600 biñ rublelik zarar ketirdiler».

Cinaiy işniñ taqiqatı devam etmekte, – dep qayd ete Taqiqat komiteti.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

Rusiyege qoltutqan faallerniñ 2014 senesi fevral 26-da ötkerilecek miting aqqında ilânı
Rusiyege qoltutqan faallerniñ 2014 senesi fevral 26-da ötkerilecek miting aqqında ilânı

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG