Brussel – NATO birligi bazarertesi künü Ukraina vekilleri ile körüşip, «Rusiye tarafından yardım körgen separatistlerniñ areketlerini ve provokatsion beyanatlarını» maqbul olmağan bir şey dep adladı. Alyans Rusiye Donbassqa daa çoq ağır silâ ketirgenini aytqan vaqıtta Ukraina vekilleri eki taraflı körüşüvlerde cenk yardımını istep, Ukraina silâlı quvetleri er angi stsenariyge azır olğanını bildireler.
NATO yanındaki Ukraina missiyasınıñ yolbaşçısı İgor Dolgov Ukraina-NATO Komissiyasınıñ acele toplaşuvından soñ qayd etti ki, Rusiyeniñ esas maqsadı Ukrainanıñ Avropa atlantik alyansına kirüvini toqtatmaq ya da yavaşlatmaqtan ibarettir. Ukraina diplomatı dey ki, cenk mevzusında Rusiye mantığını añlamaq zordır.
Ukraina ordusı zıddiyet alanında er şeyge azırİgor Dolgov
«Kremlniñ tüşüncelerini ögrenmek zordır, çünki olar soñki aftalar devamında faal cenk uruşlarını arttırıp başladılar. Lâkin Ukraina ordusı zıddiyet alanında er şeyge azır», – dep ayta Dolgov.
Avropa atlantik birligi tarafından cenk yardımınıñ quvetleştirilmesi aqqında muracaat boyunca İgor Dolgov qayd etti ki: «NATO cenk-siyaset teşkilâtı olaraq bu vaziyette Ukrainağa uçuş silânı bermey».
«Bunıñnen beraber, bizler farqlı devletler, şu cümleden NATO memleketleri ile, eki taraflı seviyede işke devam etemiz, – dedi diplomat. – Elbet de, cenk alanında Rusiye ağır cilâsınıñ artmasını köz ögüne alıp, bizler Ukraina içün qoşma arbiy yardım istedik».
Ukrainada NATO legionı – olmaycaq bir şey – NATO reberi
NATO baş kâtibi Jens Stoltenberg Vladimir Putinniñ Donbassta «çetel NATO legionınıñ» bulunması aqqında aytqanlarına cevap berdi.
«Ukrainada NATO legionınıñ bulunması aqqında laflar – olmaycaq bir şey. Anda NATO legionı yoq, Ukrainada bulunğan yekâne çetel ordu – Rusiyeniñdir. Mesele budır: Rusiye quvetleri Ukrainada bar, Rusiye separatistlerge silâ bere, ve bizler Rusiye tarafından separatistlerge kösterilgen yardım artmasını köremiz. Ve farqlı ağır tehnika çeşitleri aqqında laf kete», – dep ayttı NATO yolbaşçısı. Onıñ qayd etkenine köre, silâ arasında zemaneviy raketa sistemaları, ağır toplar, tank, radioelektron küreş sistemaları mevcut.
Ukrainada bulunğan yekâne çetel ordu – RusiyeniñdirJens Stoltenberg
Bazarertesi künü, yanvar 26-da, Vladimir Putin Peterburg studentleri ile körüşip, Ukraina ordusını «çetel NATO legionı» dep adladı.
«Asılında, bu ordu degil, bu çetel legionı, elbet de, mında Ukrainanıñ milliy menfaatlarını tüşünmegen NATO legionıdır. Anda Rusiyeniñ geopolitik maqsatlarını toqtatmaqnen bağlı vazifeler bar», – dedi Putin.
NATO bildirgenine köre, alyans Rusiyege qarşı kirsetilgen cezalarğa qoltuta, bu mesele alyans yolbaşçısınıñ Avropa birligi çetel işleri yuqarı vekili Federica Mogherini ile körüşüvinde baqıldı. «Jens Stoltenbergniñ zanınca, iqtisadiy cezalar ğayet müim, çünki Rusiye ve Kreml halqara uquq qaideleri ve şartlarğa riayet etilmemesiniñ aqibetleri bar olğanını köre», – dep qayd etti o.
Maqaleniñ asıl nushası – Radіo Svoboda saytında
