Kiyev studentleri Moskva aliy oquv yurtlarında oquğan studentlerge «informatsion perdeni kötermek», Rusiye ve Ukraina kelecegi aqqında tüşümek ve Rusiye teşviqatına inanmamaq çağıruvı ile video muracaatını yazğanlar:
– Biz, Milliy aviatsion universitetiniñ studentleri, sizge, Moskvanıñ Grajdanlıq aviatsiyası devlet tehnikiy universitetiniñ studentelerine, muracaat etemiz.
– Biz, Ukraina milliy tehnikiy universitetiniñ taqımı, Kiyev politehnik institutı, bizni Moskva devlet tehnikiy universitetiniñ er bir studenti ve hadimi eşitkenini isetymiz.
– Taras Şevçenko adına Kiyev milliy universiteti Lomonosova adına Moskva devlet universitetiniñ studentlerine muracaat ete.
– Milliy iqtisadiy universitetiniñ studentler parlamenti «Sinergiya» Moskva maliye-sanayı universitetiniñ studentlerine rica ete.
– Memleketimizde şimdi cenk kete, memleketimizde em siziñ, em bizim askerlerimiz elâk ola, yerli sakinler elâk ola. Sizni informatsion perdeni kötermege çağıramız. Körgeniñizden şübe etiñiz.
Aqiqaten aramıznı bozğan – informatsion gürültisi
– Rusiyeliler ukrainalılar ile bir halqtır, dep aytalar. Belki, öyle edi, bir vaqıtları. Şimdi bir-birimizden farqlanamız, barrikadalarnıñ farqlı taraflarında turamız, aramızda ise – añlaşılmamazlıq. Aramızda faşistler, ukrain milletçileri, «Pravıy sektor» aqqında masallar tura. Aqiqatta aramıznı bozğan – informatsion gürültisidir.
– Biz siznen studentmiz. Studentler – areket, milletniñ küçü ve kelecegi. Halqıñıznıñ lâyıq vekilleri oluñız. Özleriñizni suniy haberler ile kirletmeñiz, siyasiy oyunlardan temiz ve aqıllı oluñız. Tüşüniñiz, teşkeriñiz, şübeleniñiz.
– Yıl evelsi memleketimizde Yanukoviçniñ diktatorlığı yoq etildi. Qaparcılıq, yevrointegratsiyadan vazgeçüv, matbuat vastalarında tsenzura, militsiyanıñ qanunsızlığı studentlerni narazılıq numayışına çıqmağa mecbur etti. Qanlı dağıtuvdan soñ memleket boyunca millionlarnen insan çıqtı. Biz qorqa edik, çoq insan elâk oldı, amma biz bunı becerdik, birleştik, daa da küçlü oldıq. Memleketiñizniñ yolbaşçılığı bunı akimiyetniñ küç vastası ile zapt etüvi olaraq adlay, amma öyle degil. Halqımıznıñ, Ukrainanıñ adiy vatandaşlarınıñ öz aq ve serbestligi oğrundaki itibar inqilâbıdır.
Er bir sözümizge inanmay bilesiñiz, sizge tek bir ricamız bar – şübeleniñiz ve teşkeriñiz
– Yaqında olıp keçken adiselerni hatırlayıq. Qırım Muhtar Cumhuriyeti – mustaqil Ukraina devletiniñ toprağıdır. Yanukoviçniñ qaçuvından soñ memleketiñizniñ ordusına tola ve avtomatlar nişanı altında Qırımnıñ Rusiyege qoşuluvı aqqında referendumnı keçire. Ebet, bu malümat siziñ matbuat vastalarıñızda ve içtimaiy ağlarda tarqatılğan haberlerden farqlı olmalıdır. Er bir sözümizge inanmay bilesiñiz, sizge tek bir ricamız bar – şübeleniñiz ve teşkeriñiz.
– Cenk. Er kün elâk olğanlarnıñ cedvelleri. Qaçaqlar. Ömür boyu saqat qalacaq yigirmi yaşında gençler. Aqiqatımız budır. Onıñ ile nasıl yaşamaq qararnı biz siznen alacaqmız.
– Siz Avropa ve Amerika Qoşma Ştatları Rusiye Federatsiyasına nisbeten cezalar kirsetkenini alâ daa añlamaysıñızmı? Siz alâ daa ulu ve muqaddes Rusiyege qarşı fitnege inanasıñızmı? İnanıñız ki, problemlerimizde qabaatlı olğan tek biz sizlernen, daa doğrusı, memleketimizniñ yolbaşçılığı. Birinci yerge insan ayatını qoyğan Avropa ve Amerika bir kimseni boysundırmay, yalıñız öz mevamını qorçalay.
Biz siznen ilmiy olimpiadalarda ve Olimpik oyunlarında yarışmağa isteymiz, Donbassta degil
– Böyle alda ne sizge, ne bizge balalarımızğa ne içün bir-birimizge ateş açqanımıznı añlatmağa acet olmaz. Ya da ne sebepten cenkni toqtatmaq içün bir şey yapmadıq. Böyle umumiy tarihımız içün ayıp olacaqtır.
– Memleketlerimizniñ kelecegi bizge bağlı. Biz siznen birlikte devletlerimizni inkişaf etecekmiz.
– Biz siznen ilmiy olimpiadalarda ve Olimpik oyunlarında yarışmağa isteymiz, Donbassta degil.
İşbu rolikniñ ğaye müellifi – Kiyev Milliy aviatsion universitetiniñ mezunı Yevgen Melnik. O, Moskva studentleri Ukrainadaki yaşdaşlarınıñ sözlerine diqqat eter, dep ümüt ete.
– Bu ğayege Kiyev universitetleriniñ adiy stundentleri qoşuldı. Esas maqsat – Rusiyedeki teşkviqatqa qarşı çıqmaq. Oğlançıqlarnıñ haçqa kerüvi aqqında ve buña oşağan diger haberlerni baqmağa ve oqumağa pek qorqunçlıdır.
– İştirakçilerni nasıl sayladıñız?
– Ğaye müellifi men olam. Universitetlerniñ içtimaiy ağlardaki gruppalarında bir-biri ile subetleşken faal gençler bardır. Biz studentlerge telefon açıp, ğayemizni añlattıq, olar da razı oldılar. Muracaatnıñ metnini birlikte yazdıq. Soñra kamerası olğan dostumızğa telefon açıp, ricada bulundıq. Çektik, montaj ettik ve internetke yükledik. İzaatlarda yazılğanı kibi, professional ceetten çıqarılğan kadrlar, videomontajörlar, bu kibi bir şey yoq edi. Studentlerniñ adiy bir teşebbüsidir.
– Siz videoñız ukrain teşviqatı ve informatsiya ile oğraşqan devlet strukturası tarafından teşkil etilgen bir teşebbüs olğanı aqqında qabaatnı red etesiñizmi?
– İşimizge nazik bir seslenüv. Yoq, informatsion cenkni toqtatmağa istegen adiy studentlermiz. Şimdi Donetsk ve Lugansk vilâyetlerindeki adiselerge siltem bergen informatsion cenktir. Onıñ sayesinde arbiy areketler ep arta.
– Siz Moskvanıñ muayyen aliy oquv yurtlarınıñ studentlerine muracaat ettiñiz. Nasıl reaktsiyanı bekleysiñiz?
– Olarnıñ muracaatını bekleymiz. Tabiiy ki, bu usul ile fikrimizni Rusiyeniñ bütün vatandaşlarına yetkizidirip olamamız. Moskva universitetleriniñ studentlerini şimdi Rusiyede tarqatılğan malümatnı teşkermege çağıramız.
Maqelniñ asıl nushası – Radio Svoboda saytında
