Link açıqlığı

Zair Smedlâyev FSB sorğusına çağıruv aqqında: repressiyalar artmasını beklemek kerek


Qırımtatar Milliy Qurultayınıñ Merkeziy saylav komissiya reisi Zair Smedlâyev

İşğal etilgen Qırımda Rusiye Federal havfsızlıq hızmetiniñ idare taqiqat bölügi qırımtatar faali, Qırımtatar Milliy Qurultayınıñ Merkeziy saylav komissiya reisi Zair Smedlâyevni «mayıs 3» işi boyunca sorğuğa çeke. Sorğu keçirilmesi fevral 6-na planlaştırıla.

Faalniñ Facebook saifesinde derc etken celpname metninde aytıla ki, bölük «2014 senesi mayıs 3-te «Armânsk avtodorojnıy» kiriş noqtasında Rusiye Federatsiyası sıñırından belli olmağan insanlarnıñ küç qullanuvı ile keçmesi, yani Rusiye Federatsiyası Cinaiy kodeksiniñ 322-ndi maddesi 3-ünci qısmı boyunca cinayet yapılmasını» teşkere.

Zair Smedlâyev Qırım.Aqiqatqa bildirdi ki, o, bunı Rusiye akimiyetiniñ qırımtatarlarğa basqısını arttırmaq içün «bir manaçıq» olaraq tanıy.

«Qırımtatar faallerine, em de akimiyet teklif etken qırımtatarlarnıñ lideri, «yahşı» olğan Remzi İlyasov aqqında yazmağan milliy kütleviy haber vastalarınıñ jurnalistleri, şu cümleden – «Avdet» gazetası, QHA agentligi, ATR telekanalına basqı yapıla», – dep tüşüne Smedlâyev.

Onıñ zanınca, qırımtatarlarğa nisbeten ilerideki cinaiy işler 2014 senesi fevral 26-da Qırım Muhtar Cumhuriyetiniñ Yuqarı şurasınıñ binası yanında keçirilgen miting ile bağlı olması mümkün.

«Mayıs 3» işiniñ bir neticesi yoq. Fevral 26 künü boyunca ciddiy bir qabaat çıqarmağa tırışacaqlar. Repressiyalar artmasını beklemek kerek», – dedi Smedlâyev.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG