Link açıqlığı

Saatnıñ esas haberi

ATR telekanalında silâlı insanlar tintüvni keçire. Qırımtatarlar bunı akimiyetniñ yañı toqatı olaraq tanıylar


Вazarertesi künü, yanvar 26-da, silâlı insanlar bir yıl devamında olıp keçken adiselerniñ video malümatını, şu cümleden, fevral 26 künüQırım parlamenti divarları yanında keçirilgen mitingniñ videosını saqlağan bilgisayar serverini tutıp almaq içün ATR qırımtatar telekanalına sürip kirdi. Tintüv endi 3 saat devam ete.

«ATRde «maski şou». Silâlı insanlar ile tolu «Kamaz», FHH ve Taqiqat komitetiniñ taqiqatçıları kelip çıqtı. Şimdi yolbaşçılıq ile subet keçireler. Er bir kabinetniñ yanında silâlı insan tura. İşke biraz keder etseler bile, şimdilik efir devam etmekte. Kamerağa çekmege yasaq, tehnikanı tutıp almağa vade eteler», – dep yazdı telekanalnıñ mühbiri Şevket Namatullayev öz Facebook saifesinde.

ATR telekanalnıñ acele yayınında bildirilgeni kibi, ATR yolbaşçılığı bütün malümatnı taqdim etmege azır, çünki serversiz efirge çıqmaq imkânsız olacaq.

ATR qırımtatar telekanalınıñ haber siyaseti boyunca baş müdiriniñ muaviniLilâ Bucurova canlı yayınğa çıqıp, halqqa muracaatta bulundı. O, silâlı insanlarğa bazarertesi künü telekanalda tintüvni keçirmege izin bergen yerli akimiyet areketlerini takbih etti.

«Siz qırımtatarlarnıñ yüzüne nasıl baqacaqsıñız? Areketleriñiz Rusiyeniñ reabilitatsiyağa oğrağan vatandaşlar aqqında qanunına riayet etilmesidirmi? Rusiye prezidentiniñ avalelerini böyle sürette amelge keçiresiñizmi?»,– dedi o efirde.

«Şimdi efirge çıqmağa imkânımız daa bar, amma bugün tam haberlerni körmezsiñiz. Ümüt etem ki, bugün bu er şey biter. Akimiyet yapqan areketleriniñ farqına barğanını ve halqqa, federal akimiyet olaraq, öz itibarına etken toqatını añlaycağına ümüt besleyim», – dedi Bucurova.

Al-azırda telekanalnıñ efiri acele haberler yayınlarına bölüne.

Qırımtatarlar telekanalğa qol tutmaq içün ATR binasına keleler

«ATR – halqımıznıñ er şeyidir. Onı şimdi qapatsalar, ileride ne olacağını bilmeyim. Halqımızğa bir toqattır», – dedi Qırım.Aqiqat mühbirine seyircilerden biri Eskender.

Telekanal binası yanında işke kelgen, amma OMON hadimleri yasağı sebebinden içeri kirip olamağan hadimler tura.

Qırım.Aqiqatqa binada bulunğan hadimler aytqanı kibi, telekanalda Wi-Fi söndürdiler. Hadimlerniñ tüşüngenine köre, bunı tintüv aqqında malümat içtimaiy ağlarğa yetmesin, dep yapalar.

Vaqia yüz bergen yerge Qırımtatar Milliy Meclis reisiniñ muavini Ahtem Çiygoz da keldi.

«Qırımtatarlarnı qorqutmaq içün bir usul, qırımtatarlar yerini bilsin, yani. Amma olar bunı böyle radikal şekilde nafile yapalar. Çünki ATR telekanalı siyasetke köre, medeniyet aqqında daa da çoq malümatnı bergen bir kanaldır. Dünyada olğan yekâne qırımtatar telekanalıdır, şunıñ içün halq onıñ ile birlikte soñuna qadar olacaqtır», – dep añlattı o Qırım.Aqiqatqa.

Silâlı insanlarnıñ kiyiminde OMON dep yazıla, amma Qırım İçki işler nazirligi bu vaqianı izaatlamay.

XS
SM
MD
LG