Rusiye Devlet dumasında yarımada işğalinden evel «çetel devlette askerlik yapqan» işğal etilgen Qırım ve Aqyar sakinlerini askerlikten boşatuv aqqında qanun leyhası kirsetildi. Teşebbüs müellifleri farqlı fraktsiya deputatları oldı, olarnıñ yolbaşçılığnda ise kommunistlerniñ mudafaa komitet reisi Vladimir Komoyedov buluna.
TASS bildire ki, qanun leyhasına binaen, Qırım ve Aqyarda yaşap, çetel devlette askerlik yapqan vatandaşlar Rusiyede arbiy hızmetten boşatıla. Bundan ğayrı, Ukraina qanunlarına köre askerlikke çağıruvdan boşatılğan qırımlı ve Aqyar sakinleri askerlikke çağırılmaycaq.
Deputatlarnıñ qayd etkenine köre, al-azırda «Arbiy borc ve askerlik aqqında» Federal qanunına köre vatandaşlarnıñ çoqusı askerlikke çağırılacaq.
Qanun leyhası Ukraina qanunlarına köre askerlik hızmetini başqa vaqıtqa qaldırmağa aqqı olğan qırımlı ve aqyarlılar içün aynı imkânnı saqlap qalmağa teklif ete.
Deputatlarnıñ fikirince, böyle bir qanun leyhası qabul etilse, «Rusiyeniñ yañı subyektlerinde içtimaiy kerginlik olmaycaq».
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
