Yanvar 23 künü Meclis azaları Eskender Bariyev ve Abmecit Suleymanov ile birlikte Qırım çıqışında Rusiye sıñır bekçileri tarafından yaqalanğan qırımtatar milliy areket iştirakçisi Sinaver Kadırov Ermeni Bazar mahkemesiniñ qararı ile Qırımdan sürgün etilecek.
Bunı Sinaver Kadırov Qırım.Aqiqatqa bildirdi.
«Mahkeme eki biñ rublelik para cezası ve sürgünlik cezası aqqında qarar aldı», – dedi o.
Faal şunı da qayd etti ki, mahkeme onıñ sağlığı aqqında aytqanlarına qulaq asmadı.
«Men, elbet de, mahkemeniñ işbu qararına itiraz bildirmege tırışacam. Lâkin buña vaqıt kerek», – dep qoştı Kadırov.
Faalniñ aytqanına köre, mahkeme qararından soñ onı politsiya hadimleriniñ nezareti altında «sıñırğa» alıp kettiler.
«İstanbul uçağına, añlağanıma köre, keç qaldım. Olar mında uçaqqa keç qalsın dep, aselet sozalar. Qayda yol alacağımnı bilmeyim», – dedi Kadırov.
Qırımda onıñ apayı qaldı, oğlu ise Kiyevde oquy.
Sinaver Kadırov – çoq yıllar devamnda uquq qorçalayıcı ve qırımtatar milliy areketiniñ faali, dissidenttir. 2000-li seneleri «Azatlıq» areketiniñ qurucısı edi, yarımada işğalinden soñ ise Qırımtatarlarnıñ aq-uquqlarını qorçalav komitetine kirdi
Sinaver Kadırov bildirdi ki, Rusiye pasportını almadı, amma Rusiye vatandaşlığından da vazgeçmegen edi. Rusiye qanunlarına köre o Rusiye vatandaşı ola, çünki 2014 senesi mart 16-da keçirilgen «referendum» künü yarımadada qayd etilgen edi.
Onıñnen beraber gece yaqalanğan Meclisniñ eki azası azat etilip, Hersondan İstanbulğa yol alalar.
Qırım.Aqiqat bildirgeni kibi, yanvar 23-de gece Qırımtatar halqınıñ aq-uqularını qorçalav komitetiniñ koordinatorları Eskender Bariyev, Abmecit Suleymanov (ekisi de Meclis azası ola) ve Sinaver Kadırov Çonğar «Rusiye sıñırında» uquq qoruyıcı organlarınıñ hadimleri tarafından yaqalandılar. Er biri ukrain pasportını kösterdi.
Sinaver Kadırov ekimniñ mesleatına yol alğan edi.
Lâkin Rusiye mahsus hızmetleri oña, çetel vatandaşına kibi, sıñırdan keçüv vaqtında memuriy bozuv aqqında bildirip, bir qaç saatlik «subetlerden» soñ mahkemege alıp kettiler.
Sinaver Kadırov çoq yıllar devamında uquq qorçalayıcı ve qırımtatar milliy areketiniñ iştirakçisi ola. Dissidentler gruppalarında iştirak etti, sovetlerge qarşı faaliyeti içün apiske alındı ve mahküm etilgen edi. 2004 senesi «Cotton Club» barınıñ işi» boyunca mahküm etilgen qırımtatarlarnı imaye etken «Azatlıq!» areketiniñ qurucısı oldı. Yarımada işğalinden soñ Qırımtatarlarnıñ aq-uquqlarını qorçalav komitetine kirdi.
