Ukrain jurnalistleri ve göñülleriniñ malümatına köre, çarşenbeden cumaaqşamı kününe keçer gecesi Ukraina silâlı quvetleriniñ soñki askerleri Donetsk ava limanını terk ettiler – daa doğrusı, yañı terminalnı. Berilgen malümatqa köre, ordu terminalnı qamaçavdan azat etemedi. Elâk olğan ve yaralanğanlar bar – farqlı malümatlarğa köre, 37 ukrain askeri öldürildi.
Donetsk ava limanındaki yañı terminalnıñ büyük qısmı separatistlerniñ nezareti altına keçkeni bir qaç kün evelsi belli oldı. Aynı vaqıtta, snayper ve toplarnıñ ateşinden saqlanmağa imkân bergen bazı yerler askerlerniñ nezareti altında qalğan edi. Soñki eki kün devamında vaziyetni közetken ordu komandanlığı ve ukrain jurnalistleri «sessizlik rejimini» ilân ettiler – bir çoq nezaretçi tüşüngeni kibi, ava limanı ve onıñ civarındaki yerlerni Ukrainanıñ nezareti altına qaytarmaq içün. Cumaaqşamı kününe keçer gecesi censor.net ukrain saytınıñ baş muarriri Yuriy Butusov Facebook saifesinde ukrain askerleri yañı terminal viranesini terk ettiler, dep bildirdi.
Ukrain askerleriniñ muvafaqiyetsiz areketlerden soñ ava limanını terk etmek mecbur olğanlarını ukrain göñüllisi Georgiy Tuka bildirdi:
«General Mujenko yolbaşçılığında Baş ştabınıñ reberligi tarafından böyle bir arbiy areketler azırlanıldı: oğlanlarımız ücüm etip, duşmannı 3-4 km uzaqlıqqa atmalı edi. Darbe endirilgen soñ ava limanı sıñır noqtasından cebe arqasına çevirilmeli edi. Uçuş yolağınıñ yoq etilmesi de planlaştırıla edi, çünki başqa strategik obyektler artıq yoq. Yolaqnı yarım yıl devamında yoq etmegen olsalar, demek...
Vazifeniñ birinci qısmını oğlanlarımız muvafaqiyet ile becerdiler: duşman çetleştirildi ve uruşlar Donetskke avuştırıldı degen haberler doğru edi. Faqat... Topraq ya da obyektni zapt etmek yeterli degildir. Esası – onı tutmaqtır. Bu vazifeni ise oğlanlarımız beceremedi. Ne içünmi? Kendi noqtaiy-nazarımnı bildirem, yalıñız kendi fikrimni. Tafsilâtlarsız. Misal olaraq, 10 btrden «x» noqtasına yalıñız ekisi yetti. Qalğanları bozuldı. 10 tankttan – ekisi. Küçlü tuman. İlerideki 20 metr körüne edi. Duşman bağnı (mobil, em de radio) bastırdı. Bir şey körünmese, nezaret ve tüzetüv vastaları yoq.
Bizim oğlanlarımız bu vaziyetke oğradılar. Olarnıñ başqa çareleri yoq edi, yalıñız çekilmek. Em de, olarnıñ «omuzlarında» binağa terroristler kirdi. Üçünci ve birinci qatlarda – duşman bar edi, ekinci qatta ise – bizimkiler. Oğlanlar toplar ateşini kendine çekip, divarlar artında saqlanacaq ediler. Aynı bu oldı. Lâkin bu vaqıtta duşman tayamalarnı patlattı ve tavan oğlanlarımıznıñ üstüne tüşti. Parçalar altında em sağ qalğanlar, em de yaralanğanlar bar edi. Maalesef, elâk olğanlar da bar edi...
Oğlanlarnıñ bir qısmı ava limanını terk etti, daa bir qısmı esaretke tüşti. Virane altında sağ qalğanlar bar olğanına ümüt etemiz».
Ukrain askerleriniñ ava limanınıñ terk etmelerini diger qaynaqlar da tasdıqlay. Bunıñ kibi haber «Azov» göñülli batalyonınıñ Facebooktaki saifesinde ve «Armiya SOS» göñülli areketiniñ esasçılarından bir Yuriy Kasyanovnıñ Facebook saifesinde mevcut:
ATO komandanlığınıñ resmiy vekilleri ava limanı ile bağlı vaziyetni izaatlamaylar. Elâk olğan ve yaralanğan insanlar aqqında tam bir malümat yoq. Rusiye kütleviy haber vastaları 6 ölü ve esir alınğan bir qaç kişi aqqında bildireler. Diger malümatlarğa köre, soñki kün içinde 30-dan ziyade ukrain askeri elâk oldı.
Donetsk ava limanınıñ yañı terminalı 2012 senesi mayıs ayında açılğan edi – Avropanıñ futbol çempionatı arfesinde, bir qaç matç Donetskte keçirildi. 2014 senesi mayıs 26-da öz başına ilân etilgen «Donetsk halq cumhuriyetiniñ» separatistleri binanı zapt etecek oldılar, lâkin mahsus tedbirler neticesinde Ukraina ordusı ava limanını nezaret altına aldı. Lâkin ava limanınıñ uçuşları toqtatıldı. Al-azırda onıñ bütün binaları yoq etildi.
Cenk uruşları Ukrainanıñ Donetsk ve Lugansk vilâyetlerindeki diger rayonlarda devam etmekte. Donetsk vilâyetindeki Ukraina içki işler nazirliginiñ yolbaşçısı Vâçeslav Abroskin bildirdi ki, separatistler Debaltsevo ve Avdeyevka mesken yerlerine ateş açalar. «İnformatsion qarşılıq» gruppasınıñ malümatına köre, Lugansk vilâyetindeki Bahmutka yolunda çatışmalar devam ete.
Maqaleniñ asıl nushası – Radio Svoboda saytında.
