Salı künü, yanvar 13-te, Ukraina şarqında avtobusqa raketa tüşmesi neticesinde 11 yerli sakin (daa bir qadın hastahanede can berdi) elâk oldı ve 17 kişi yaralandı. Vaqia Donetskniñ cenüp-ğarp tarafından 35 kilometrlik mesafedeki Volnovaha şeeri civarında yerleşken ukrain nezaret kiriş noqtasınıñ yanında olıp keçti. Facia içtimaiy ağlarnı tepretti – ukrainler elâk olğanlarnıñ soy-soplarına taziyeler bildirip, birinci şahıslarnıñ munasebetine şaşalar.
Berilgen malümatqa köre, avtobus Azaq deñiziniñ yalısında yerleşken Mariupol şeerinden adamlarnı alıp kete edi.
İçtimaiy ağlarnıñ bazı qullanıcıları ateş altında qalğan avtobus yolcularınıñ sayısı Frenkistanda «CharlieHebdo» satirik mecmuasınıñ muarririyetine yapılğan ücüm neticesinde elâk olğanlarnıñ sayısına teñ kelgenine diqqat ayırdı. (Hatırlatamız, dünya frenklerge birdemlik bildirip, içtimaiy ağlardaki mesaclarına #CharlieHebdo ve #JeSuisCharlie hashtaglerini qoşqan edi).
Facia aqqında haber içtimaiy ağlarda tarqalıp, #JeSuisVolnovakha hashtagi ile bir çoq mesacnıñ sebebi oldı. Facebook ağınıñ qullanıcıları da birdemlik aktsiyasına qoşuldı.
«10 insan Rusiye terroristik ücümi neticesinde öldürildi. Men internette #JeSuisVolnovakha hashtagini körmeyim», – dep yazdı Twitter qullanıcılarından biri.
Böyle etip içtimaiy ağlarnıñ qullanıcıları yalıñız çetel jurnalistlerine degil, kendi semetdeşlerine de birdemlik bildirmege çağırdılar. Birdemlikke bütün dünya çağırıldı:
Türkiyedeki Ukraina Elçihanesi birdemlik aktsiyasına qoşuldı:
«İnformator» malümat resursınıñ muarririyeti de kendi saytında qoltutuv sözlerini yerleştirdi. Hadimler Volnovahada elâk olğanlarnıñ yaqınları ve tuvğanlarına taziyelerini bildirdiler.
Ukrainler bütün dünyağa facia aqqında haber etse, Ukrainanıñ birinci adamları Volnovahada elâk olğanlarnen bağlı bir şey aytmağa aşıqmadılar.
Birazdan Ukraina prezidenti Petro Poroşenkonıñ Volnovaha faciası ile bağlı video muracaatı peyda oldı. Bunıñ aqqında haber onıñ Twitter saifesinde qoyuldı:
İçtimaiy ağlarnıñ bir çoq qullanıcısı dostlarına aynı sual bere edi: ne içün Paris teraktına dünya munasebeti Volnovaha civarındaki faciağa munasebet ile aynı degil?
Yanvar 14-ne keçer gecesi Facebook ağında ukrainlerni yanvar 18-de Barışıq yürüşine çıqmağa çağırğan saife açıldı. Kiyevde yürüş Mustaqillik Meydanında bazar künü saat 12:00 keçirilecek.
Ukraina tarafı bildirdi ki, «Graddan» açılğan ateş neticesinde avtobusqa raketa tüşti. Rusiyege qoltutqan boyevikler bunı red ete, Rusiye ve Rusiyege qoltutqan neşirler ise farqlı malümatlar bere. «Donetsk cumhuriyetiniñ malümat portalı» boyevikler Volnovaha civarında ukrain ordusınıñ blokpostına ateş açqanını bildirgen edi, soñra ise bu imkânsız olğanını bildirdi.
