Ukraina ve Rusiye uquq qoruyıcıları tüşüngeni kibi, qırımlılarnıñ aq ve serbestligini bozğan bir sıra Rusiye ve Ukraina qanunlarını qayd etmek mümkün.
«Qırımlılar içün telükesi olğan beşten ziyade qanun bar. Amma olardan eñ havflı soylarını sayladıq. Ekstremizm ve separatizm içün ve eki vatandaşlıqnıñ olması içün mesülietniñ artması aqqında Rusiye qanunları, Qırımda «serbest iqtisadiy zona» aqqında Ukraina qanunnı, em de Qırım akimiyeti tarafından qabul etilgen halq imayesi faaliyetiniñ resmiyleştirilüvi aqqında qanun», – dep bildirdi «Qırım alan missiyası» uquq qoruyıcı teşkilâtınıñ başı Andrey Yurov bazarertesi künü İnterfaks-Ukraina agentliginde keçirilgen matbuat konferentsiyasında.
Onıñ aytqanı kibi, Qırım sakinleri halqara uquqlarğa köre, Ukrainanıñ, amelde ise Rusiyeniñ qısmı olaraq sayılğan Qırım yarımadası etrafında olğan vaziyetniñ mabüsleri olğanlar.
İnsan aqları boyunca Ukraina Helsing birliginiñ adliyecisi Darya Sviridova aytqanı kibi, «Qırımda serbest iqtisadiy zonanıñ teşkil etilmesi aqqında» qanun Ukrainanıñ Milliy bankınıñ diger qararları ile Qırımda yaşağan Ukraina vatandaşlarını çetel vatandaşları olaraq tanıy.
«Qanun Ukraina Anayasasınıñ bir sıra qaidelerini boza ve İnsan aqları boyunca Avropa konventsiyası ceyetinden diskriminatsiyanı meydanğa ketire»,– dedi Sviridova.
Onıñ sözlerine binayen, qırımlılar içün Rusiye migratsion qanunları da telükelidir. Bunıñ ile, Qırımda, uquq qoruyıcılarnıñ fikrine köre, Rusiye Cinaiy Kodeksiniñ separatizmge çağıruvlar içün mesülietniñ olması aqqında qanunlarınıñ da telükesi bardır.
