Qırımda Rusiye bankları grivnanı satın almay.
Bunı Qırım.Aqiqat mühbirine bazarertesi künü, yanvar 12-de, Qırım paytahtınıñ banklarında grivnalarnı rublelerge bozıp olamağan Aqmescit sakini bildirdi.
Ukrain para birlemi ile muamelelerden vazgeçüv sebebini añlatmadılar. Şimdi, qırımlılar aytqanı kibi, grivnanı Qırımda yalıñız gizli şekilde bozmaq mümkün eken.
Evel bildirilgeni kibi, yanvar 1-den yarımadada para bozduruv noqtaları resmiy şekilde qapatıldı.
Faqat olardan çoqusı para birlemini gizli şekilde satmağa devam ete. Evel olğanı kibi, üç esas para birlemi satıla – dollar, yevro ve grivna. Şimdi para bozduruv noqtalarında bir grivnanı 3 rubleden satın ala, 3,60 rubleden ise satalar.
Malüm olğanı kibi, 2015 senesi yanvar 1-den itibaren işğal etilgen Qırımda Rusiye qanunlarına köre para birlemini yalıñız bank bölüklerinde satın almaq ya da satmaq mümkün.
