Link açıqlığı

Saatnıñ esas haberi

Qırımnıñ naqliyat qamaçavı. İnsanlarğa yarımadanı açqan yol


Qırımğa cayav
Bekleñiz, lütfen
Embed

No media source currently available

0:00 0:02:14 0:00

Qırımğa cayav

Aqmescit – Qıtaiy Ukraina ile demir yol ve avtobus alâqasınıñ toqtatılması ve Keriç parom keçitiniñ qapatılması sebebinden Qırım naqliyat «qamaçavı»na oğradı. Şimdi Herson ve yarımada ile memuriy sıñırnı tek yengil maşina vastasınen ya da cayav keçmege mümkün. Qırım akimiyeti yolcularnıñ avuştıruvı içün avtobuslarnıñ kirsetilmesi aqqında bildirgen edi, amma insanlarnıñ aytqanına köre, olar amelde işbu naqliyatnı körmeуler. Ukraina akimiyeti öz areketini havfsızlıqnıñ qoruvı ile añlata.

Belli olğanı kibi, cuma künü, dekabr 26-da, «Ukrzalіznitsâ» Qırım ide demir yol alâqasını toqtattı ve yarımadağa qatnağan halqara trenlerni lâğu etti. Qırımğa qatnğan trenler endi yalıñız Novoalekseyevka ve Hersonğa qadar bara. Bundan da ğayrı, Ukraina infrastruktura Nazirligi Qırım ile avtomobil yolcu avuştıruvınıñ toqtatılması aqqında bildirgen edi.

«Diversion taqımlarından qoruv»

Qıtaiy Ukrainadan soñki eki tren Qırımğa cumaertesi künü, dekabr 27-de, Kiyevden keldi. Ukraina paytahtında yaşağan yolculardan biri Ruslan Qırım.Aqiqatqa Qırımğa ömür arqadaşı ile tuvğanlarını yañı yıl bayramları ile hayırlamaq içün kelgenini bildirdi. Peyda olğan naqliyat qıyınlıqları onıñ içün tesadüf oldı.

«Keri qaytmaq içün biletlerni yanvar 8-ne alğan edik, olarnı qaytarmacaqmız, çünki o vaqıtqa qadar demir yol alâqası pekitilecegine ümüt besleymiz», – dedi o. Bunıñ ile o şunı da añlay ki, eger de trenlerni ğayrıdan kirsetmeseler, internetten grivnalarğa alınğan biletler ğayıp olur, çünki «rusiyeli» Aqmescitte olarnı keri almazlar ve aqçanı tazmin etmezler. Böyle alda Ruslаn ne etecegini ve Kiyevge nasıl qaytacağını bilmey.

Aqmescit kassirleri biletlerni keri alıp, aqçanı qaytarmağa istemeyler. Bunıñ yerinde, insanlarğa Rostov-na-Donu şeerinde yerleşken Federal yolcu şirketiniñ Şimaliy-Kavkaz bölüginiñ yolbaşçısı adına arizalarnı toldurmağa teklif eteler

Faqat, evel Rusiye rublelerine alınğan bilet aqçasını da qaytarmağa qolay bir mesele degil. Yolcular Aqmescit kassirleri biletlerni keri almağa ve aqçanı qaytarmağa istemegeni aqqında bildireler. Bunıñ yerinde, insanlarğa Rostov-na-Donu şeerinde yerleşken Federal yolcu şirketiniñ Şimaliy-Kavkaz bölüginiñ yolbaşçısı adına arizalarnı toldurmağa teklif eteler. Arizacı biletniñ qaytaruv sebebini ve öz bank esabını qayd etmek kerektir.

«Yañı yıl ve Milât bayramına Krivoy-Rog şeerinde yaşağan soy-soplarımızğa baracaq edik, şimdi planlarımıznı deñiştirmege mecburmız – Qırımda qalacaqmız, trenler qatnamay, tazminatnı elde etmek içün biletlerni qaytarmaq kerek», – dep şikâyet ete Qırm.Aqiqat mühbirine Aqmescitte Tolstoy soqağında yerleşken demir yol kassasında nevbette turğan qadın.

Qırım ve qıtaiy Ukraina arasında trenler ve yolcu avtobusları ne vaqıt devamında qatnamaycağı belgisizdir. Yüz bergen vaziyetni «qamaçav» olaraq adlamamağa çağırğan resmiy Kiyev müddet boyunca izaat bermey.

«Qırımnıñ qamaçavı degildir, – dedi Ukraina prezidenti Petro Poroşenko bazarertesi künü, dekabr 29-da, yekünleyici matbuat konferentsiyasında. – Ukrainanı diversion taqımlarından qorçalağan tedbirlerdir. Ukraina devletiniñ bar olğanına telüke ketirgen insanlarnıñ tren ve avtobus vastası ile serbest qatnavı şimdi, terrorizm havfı olğan zamanda, mümkün olmağan bir şeydir».

Poroşenkonıñ aytqanı kibi, şimdi işbu naqliyat vastalarınıñ effektiv nezaretiniñ pekitilmesi ögrenile. «Tınçlığımıznı ve memleketimizniñ havfsızlığını qorumaq kerekmiz», – dey devlet başı.

Üç kilometr cayav

Qırımnıñ naqliyat «qamaçavı» sebebinden planlarını deñiştirmegenler yarımadağa barıp yetmek ya da onıñ sıñırından çıqmaq içün atta cayav yürmege mecbur oldılar.

Qırımlı Ali Memetov aytqanı kibi, bazar künü, dekabr 28-de, saba erte tren ile Novoalekseyevkağa kelip, o, demir yol vokzalından taksi ile Herson memuriy sıñırına barıp çıqtı. 25 km mesafeni keçmek içün 100 grivna töledi. 150 insandan ibaret olğan nevbette beklev vaqtı eki saatke uzandı. Bu vaqıt devamında migratsion kâğıtları toldurıla ve vesiqalar teşkerile edi. Ukrain sıñır bekçileri tarafından pasportlar teşkerilgeninden soñra, Qırımğa barıp çıqmağa aves etkenler «bitaraf» territoriyanı – suvuq ve yelli ava şaraitlerinde – mustaqil sürette keçmek kerek edi. «2-3 km cayav, çantalar ile, soñra Rusiye sıñırına rastkelemiz, kene nevbette turıp, migratsion kâğıtlarnı tolduramız. Soñra kene nevbet, neticede, daa bir saat. Mına o – Qırımğa yol açqan ve çoq beklenilgen şlagbaum», – dep tarif ete Ali. Onıñ aytqanına köre, ketişat tahminen 5-6 saat devam etti. Bundan soñra Memetovnı maşina ile tuvğanları qarşıladı.

Qırımlı Lüdmila Novoalekseyevkadan Qırımğa şahsiy maşinası ile yol aldı. «Saba saat 8-de demir yol vokzalından çıqtım, sıñır nezareti ve nevbetler 18 saatke sürdi»,– dep añlata o Qırım.Aqiqat saytına.

Lüdmila da naqliyat alâqası yaqında açılacağına ve tren ile avtobuslarnıñ areketi ğayrıdan pekitilecegine ümüt besley. Aks alda, dey Lüdmila, uzun nevbetlerde turıp, Qırımdan qıtaiy Ukrainağa şahsiy arabası ile barıp çıqacaqtır. «Başqa çare yoq, anda soy-soplarım yaşay, bağımıznı saqlamaq kerekmiz», – dey o.

Şaatlarnıñ aytqanına binayen, «sıñırnıñ» keçüvi vaqtında qaparcılıq meselesi de qayd etile. Bunı öz Facebook saifesinde qırım blogeri Yelizaveta Bogutskaya yaza. Onıñ sözlerine köre, aqayından qaparnı ukrain gümrük hızmetiniñ vekili talap ete edi.

Aynı zamanda, yarımadağa Novoalekseyevkadan yol alğan daa bir qırımlı Bekir Suleymanov «işbu »sıñırlar»dan cayav keçmege daa da oñaytlı» olğanını qayd ete. «Olduqça havfsız. Bilesiñizmi, mında bayağı insan bar, yalıñız degilsiñiz. Qorqunçlı bir şey yoq, yolcu ve yengil maşinalar içün bütün sıñırlar açıqtır. Balaları olğan qadınlar içün sıñırdan keçmege daa da qolay», – dep tarif ete Bekir. Onıñ aytqanı kibi, Novoalekseyevkadan Çonğarğa qadar avtobus ve taksi vastası ile barıp çıqmaq içün bir insan 100 ve 250 grn tölemek kerek. «Anda şimdi serbest çarşı, еr şey siziñ diplomatik qabiliyetiñizge bağlı. Rusiye sıñır noqtasından soñ Canköy şeerine qadar taksi ya da avtobuslar ile barıp çıqmağa mümkün», – dey Suleymanov.

Bunıñ ile, göñülliler Çonğarnı öz başına keçmege azırlanğanlar içün nevbetteki cedvelni azırladılar.

«Bir sefer torbası – ne qadar az çantañız olsa, o qadar da yahşı, çünki cayav yürmege kerek olur, oñaytlı ayaqqap, qolçaqlar, naqliyat/diger şeylerni ödemek içün grivna ve rubleler, issi, suvsiñirmez, başlığı olğan üst urba, qalın ştan, tüp urba, çetel pasportı, çay ile termoslar ve aş», – yolğa böyle tarzda çıqmağa tevsiye eteler.

Vade etilgen avtobuslarnı körmediler

Qırım akimiyeti, öz nevbetinde, Naqliyat nazirligi Çonğar ve Canköy kiriş noqtaları tarafından Ukraina Rusiye «sıñırına» qadar yolcularnı alıp ketken avtobuslarnı kirsetkeni aqqında haber ete. «Qırım ile memuriy sıñırda Çonğar ve Canköy arasında vatandaşlarnı ukrain sıñırından Rusiye Federatsiyasına qadar alıp ketken mikroavtobus yüre»,– dedi Qırım transport «naziri» Anatoliy Tsurki. Evel, naqliyat nazirliginiñ malümatına köre, Qırım şimalinde Ukrainanıñ Rusiye ile «sıñır noqtalarına» qadar yürgen yolcu trenlerniñ qatnavı teşkil etilgen edi.

​Faqat, «sıñırdan» keçkenler Qırım.Aqiqatqa işbu avtobuslarnı körmegenleri aqqında bildireler. Yarımadağa ya da Herson vilâyetine olar ya cayav, ya da toqtağan maşinalar vastası ile barıp çıqa edi.

«Qırım tarafından bizni Canköy ya da Aqmescitke alıp ketecek avtobuslarnıñ olacağını vade etken ediler. Biz keldik (Çonğar kiriş noqtasına – muar.) ve bir şey yoq. Şimdi ya taksini çağırmaq, bu ise pek paalı bir çare, ya tuvğanlarnı beklemek mecburmız – buña vaqıt kerek olur», – dey Qırımğa ana-baabsına yañı yıl bayramlarını qarşılamaq içün dekabr 30 künü kelgen Kiyev sakini Svetlana.

Bunıñ ile Canköy şeerine Aqmescitten yolcu tren vastası ile, Ermeni-Bazarğa ise Canköyden kelmek mümkün.

Qırım.Aqiqatqa Aqmescit demir yol malümat hızmetinde aytqanları kibi, Aqmescit-Canköy yönelişi boyunca ve keri künde 8 tren, Canköy-Ermeni Bazar ve keri – 2 tren yüre. Aqmescit-Canköy treninde platskart fiyatı – 500 ruble, kupe – 800 ruble tura.​

XS
SM
MD
LG