Link açıqlığı

Yarımadada yarıqnı söndürmege başladılar, em de Qırımnen naqliyat munasebeti, niayet, toqtatıldı, bunı körgen şefqatlı vatandaşlar (esasen, qıtadan) aman bu kibi areketler güzel ve oñaytlı bir şey olmağanı aqqında fikirlerini bildirmege aşıqtı. Bazıları Yañı yılğa kelip olamağanı sebebinden busana, digerleri qırımlılarnıñ Ukrainağa munasebeti deñişecegi içün qasevet çeke.

Maña Qırımda bunı oqumağa, eñ azından, hucur kele. Mümkün olsa, alâ daa añlamağanlar içün hatırlatırım: QIRIM İŞĞAL ETİLGENDİR! MEMLEKETTE ENDİ BİR QAÇ AY DEVAMINDA CENK KETE!

Ve bazıları cenkten Yañı yılğa evine endi iç bir vaqıt qaytıp olamaz!

Memleketi ile bağnı coyğan vatanperver-qırımlılar aqqında qasvete çekmege kerekmey – Rusiye tarafdarları da, utanmayıp, öz maliyeviy meselelerini çezmek içün qıtaiy Ukrainağa barıp kele edi. Biz ise dost-tuvğanlarımız ile bağ qurmaq içün imkân taparmız.

Bir kimsede Ukraina aqqında menfiy tüşüncelerniñ peyda olacağı aqqında fikir yürsetmege kerekmey. Şu Rusiye tarafdarlarınıñ açuvı, yaqın zamanda, Qırım meselelerinde aqiqaten qabaatlı olğanlarğa aylanır. Olar er vaqıt bir şey sebebinden hoşnutsızdır, şularnı memnün etmege tırışmağa kerekmey. Homo sapiens içün er şey daa baarden añlaşıldı. Bundan da ğayrı, bu qamaçav Qırımnı daa da tez vaqıtta qaytarmaq içün bir usul olaraq körüne edi (ve körüne).

İşğal ve cenk – oñaytsız ve hoşsız ber şeydir. Siz bunı bilmey ediñizmi?

Нalqımızğa hatırlamaq içün çoq şey bar – birinci vaqıtları Vatanda yaşayışı nasıl edi – 90-ncı seneleri, boş yerde, qurucılığı bitmegen evlerde, iç bir alâqa olmadan... Amma o vaqıt bu er şey yalıñız bizim meselemiz edi, diger qırımlılarnıñ buña işi bile yoq edi.

Ebet, olayatqan adiseler em Qırımda, em de onıñ tışında yaşağanlarğa bir sıra oñaytsızlıq ketire. Amma işğal ve cenk – oñaytsız ve hoşsız ber şeydir. Siz bunı bilmey ediñizmi?

Baarde quvanıp, «trikolor»larnı kötergenler ya da er şeyge pervasızlıq ile yanaşqanlar ukrain elektrikasından kesile bilecek hastahane ve loqsahaneler, atta özleri aqqında ne içün tüşünmediler?

Bilesiñizmi, evimniñ idarecisi böyle tarzda fikir yürsete edi: «Ukraina episi bir suv ve elektrikanı söndürmez, çünki onı masraf etecek bir yeri de yoq»! Şimdi ise, bu kibi yañılıqlar içün qart olğanını aytıp, efkârlanıp otura. Faqat, oña, nefaqanı alğan insanğa, şikâyet etmege iç te keregi yoq – baarden başlap, nice insan asılında işsiz otura.

Şunıñ içün bizge Qırımda yarıqnıñ söndürüvine, naqliyat ve iqtisadiyat qamaçavına quvanmağa keder etmeñiz. Çünki bugün – vaziyetimiz ne derecede osal olsa, o qadar da yahşı.

Elzara Beşuyli, bloger, qırımlı

«Fikir» rubrikasında bildirilgen tüşünceler müelliflerniñ noqtaiy nazarını aks ettirip, muarririyetnen aynı olmaması mümkün

XS
SM
MD
LG