Link açıqlığı

Qırım ile naqliyat munasebetlerniñ toqtatuvı – iç bir şeyge yaramağan usul, – Aslan Ömer Qırımlı


Qıtaiy Ukraina ve Qırım arasında demir yol ve avtobus munasebetiniñ toqtatuvı vaziyetni kerginleştirir ve yarımadanıñ Rusiyege qoşuluvını tezleştirir.

Bunı Qırım.Aqiqat saytına Ukraina nazirler Kabinetiniñ Qırım Muhtar Cumhuriyeti ve Aqyar meseleleri boyunca Departamentniñ başı, Qırımtatar Milliy Meclis reisiniñ muavini Aslan Ömer Qırımlı bildirdi.

«Qırım ile naqliyat munasebetniñ toqatutvı Rusiye diversantlarnıñ ola bilecek ücümi ile bağlı olğanı aqqında bildirüvler aqiqatqa uymay,– dedi Qırımlı. – Bizde Qırım Muhtar Cumhuriyeti ve Herson vilâyetiniñ memuriy sıñırlarında kiriş noqtaları çalışa. Ukrainanıñ mahsus ve uquq qoruyıcı hızmetleri havfsızlıqnı temin etmek içün nezaret noqtalarında teşkerüvni daa da ciddiy sürette keçire bile. Eger de sizde Rusiye ile teftiş etilmegen yüzlernen sıñır kilometrleri olsa, Qırım ile sıñırnı qapatmağa acet barmı? Misal içün, Vaşington sentâbr 11 künü olğan teraktlardan soñ devlet sıñırlarını qapatmadı, amma AQŞ vatandaşları tarafından eyi şekilde qabul etilgen havfsızlıq qararlarını kirsetti».

Qırımlı şunı da qayd etti ki, ukrain memurları qırımlılar nişan altında keçirilgen mart ayındaki qanunsız referendumğa qol tutmağanı aqqında defalarca bildirgen edi. «Bugün ise ne köremiz? Ukrainağa sadıq qalğan Qırım sakinleriniñ memleketimiz toprağı boyunca serbest areket etmege ve soy-sopları ile körüşmege imkânlarını yoq ettiler. Bizni bağlağan yipni yırtamız! Qırım sakinlerinden ada ealisini yapıp, Qırımnı qıtadan ayırıp, Ukraina kendi vatandaşları tarafından tenqitke oğratıla bile. Eger de böyleliknen Qırımnıñ Rusiyege qoşuluvını tezleştirmege isteseler, o vaqıt, usullar doğrudır», – dedi Qırımlı.

Ukraina nazirler Kabinetiniñ Qırım Muhtar Cumhuriyeti ve Aqyar meseleleri boyunca Departamentniñ başı aytqanı kibi, Ukraina akimiyeti «vatandaşlarnıñ ayatını daa da qıyın etmek yerinde, olarnıñ işğalge nasıl dayanacağını» tüşünmek kerek. «Bizde ise Nazirler kabinetinde bile Qırımda yalıñız Rusiye vatandaşları yaşağanı aqqında fikirler bar. İç bir şeyge yaramağan bir yol. Belki de, bir kimse «qırğıy» olmağa istep, Moldova ve Gürcistan tecribesini toprağımızğa keçirmege areket ete. Amma er bir vaziyet şahsiydir. Resmiy Kişinöv Pridnestrovye olarğa yevrointegratsiya meselesinde keder etkenini endi añladı ve işbu topraqtan vazgeçmege bile azır. Yani, bu kibi qararnı alğanlar Qırımnı Ukrainağa Avropağa keçmege keder etken bir lengen olaraq tanıy», – dep qoştı Aslan Ömer Qırımlı.

XS
SM
MD
LG