Qırım sakinlerine Rusiye pasportlarınıñ berilmesi bütünley yekünlendi. Bunı «Qırım Cumhuriyeti boyunca Rusiye FMH idaresiniñ» yolbaşçısı Pötr Yaroş bildirdi, haber ete RİA Novosti.
«Qırım Cumhuriyetinde 1,56 milliondan ziyade Rusiye pasportı resmiyleştirildi. Ögümizde olğan vazifeni becerdik», – dedi Yaroş.
Olğan malümatqa köre, 5-7 yıl devam etecek bu ketişat keçici müddet devamında, yani mart-dekabr ayları arasında becerildi.
Cumhuriyette Rusiye pasportlarınıñ berilmesi bedava keçti. Amma 2015 senesi yanvar 1-den Rusiye vatandaşı pasportınıñ – 300 ruble, çetel pasportınıñ elde etilmesine – 3,5 biñ ruble ödemege kerek olur.
Müessiseniñ malümatına köre, bu aylar içinde Qırımda FMH organlarından 3 million 500 insan keçti. Hızmetniñ başı aytqanı kibi, hadimlerniñ bir qısmı bu ağır işke dayanmayıp, vazifelerinden vazgeçtiler. Vatandaşlarğa qaba şekilde davranğan hadimler de işten boşatıldı.
Qırım boyunca FMH matbuat hızmetiniñ malümatına binayen, oktâbrniñ soñuna cumhuriyet sakinleriniñ 99% Rusiye pasportlarını elde etkenler. Qırımnıñ 3,5 biñ sakini ukrain vatandaşlığınıñ saqlanılması aqqında ariza yazğan.
Qırımda Rusiye çetel pasportlarnıñ berilmesi 2014 senesi küzde başlandı. Bugün, FMH malümatına köre, 8 biñden ziyade ariza ve 2 biñden ziyade pasport resmiyleştirildi.
Bugün Qırımda çetel pasportlarnıñ berilmesi boyunca tek bir noqta çalışa, Yaroşnıñ aytqanı kibi, kelecekte yarımadanıñ çeşit şeerlerinde daa 7 noqta açılacaq eken.
2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
