Link açıqlığı

Aqmescit – «Qırım» Fondu» hayriye teşkilâtı ve onıñ reberi Riza Şevkiyevniñ yañı sınav zamanı başlandı. Çoq millionlı para cezası aqqında mahkeme teşkerüvleri yerine FSB idaresinde sorğu ve hastahane tintüvleri keldi. Közeticiler uquq qoruyıcılarnıñ areketlerini «nonsense» dep adladı.

Çarşenbe künü, dekabr 17-de, Qırımdaki Federal havfsızlıq hızmetinde «Qırım» Fondu» HT müdiri Riza Şevkiyevniñ sorğusı keçirilecek edi. Sorğu sebebi beş yıl evelsi Qırımğa ketirilgen türk aleminde meşur olğan qırımtatar yazıcısı Cınğız Dağcınıñ şahsiy eşyaları oldı.

Riza Şevkiyev
Riza Şevkiyev

FSB idaresine belgilengen saatte kelgen Şevkiyevge Aqmescit rayonınıñ Colman köyündeki hastahanege yazıcınıñ eşyalarını baqmaq içün barıp kelmege teklif ettiler. Fond mülkinde olğan eşyalar yerli hastahanede saqlana. Malüm olğanı kibi, Cınğız Dağcınıñ vefatından soñ onıñ iş odasında olğan eşyalarnı Qırımğa yolladılar, ileride ise onıñ müzeyini açacaq ediler.

«İdarege kelsem, FSB hadimleri hastahanede olğan yükni teşkerecekler, dep bildirdiler. Aqmescitten biz hastahanege yol aldıq. Anda 9 nefer FSB hadimi bulunğan edi. Olar Cinaiy kodeksniñ maddesine esaslanıp, bu kontrabanda yükü olğanı aqqında qararnı seslendirdiler», – dep ayttı Şevkiyev Qırım.Aqiqat saytına.

Onıñ aytqanına köre, Ukrainada Türkiye konsullığı bergen yükni ukrain gümrük hızmetiniñ hadimleri müürlegen ediler, onıñ içün Rusiye arbiyleriniñ onı açmağa aqları yoq edi. Buña baqmadan, olar içeri kirdiler.

«FSB hadimleri bizim yanımızda qapularnı açtı. Yük qutularını sayıp çıqtılar, foto çıqardılar, er şey yerinde edi. Cumaaqaşı künü (dekabr 18-de – muar.) saba bizler FSB idaresine barıp, vesiqanı imzalap, onıñ kopiyasını alacaqmız. Soñra da, añlağanıma köre, vesiqalarnı prokuraturağa berecekler – o, cinaiy iş açılacaqmı-yoqmı qarar alacaq», – dep qayd etti Şevkiyev. Onıñ bildirgenine köre, havfsızlıq hızmetiniñ hadimleri video çıqarmağa yasaq ettiler.

Riza Şevkiyevniñ fikirince, arbiyler tintüv keçirip, Qırım Apellâtsion mahkemesinde büyük para cezaları aqqında iş teşkerüvlerinden diqqatlarını çekecek ola.

«Böyle bir şey bar ki, olar «Qırım» Fondunınıñ» reberligine tüşünip bu areketlerge cevap bermege imkân bermeyler. Bugünde-bugün 7 mahkeme esnası bar. Bizni ofisten quvdılar, imayeni qurmağa bermeyler, esaplarımız buzlatıldı, bizler adliyecini alıp olamayıq. Er kün yañı repressiv usullar çıqarıla. Bu areketler yalıñız fondğa qarşı degil, tamır halq olğan bütün qırımtatar halqına qarşı yapıla», – dep qayd etti Şevkiyev.

Soñki vaqialarğa baqmadan, fond yolbaşçısı Qırımda Cınğız Dağcı muzeyi açılacağına ümüt ete. «Bu türk aleminiñ ulu yazıcısıdır. Onıñ müzeyini mıtlaqa açacaqmız», – dedi o.

«İç bir cinayet tapılmadı»

Qırımtatar Milliy Qurultayınıñ Merkeziy saylav komissiya yolbaşçısı, milliy areket faali Zair Smedlâyev FSB hadimleriniñ areketlerini «nonsense» dep adladı.

Zair Smedlâyev
Zair Smedlâyev

​«Olarnıñ zanınca, kontrabanda yükü ketirildi. Bu bir nonsensetir. Rusiye Federatsiyasına bir de bir yük ketirilmegen edi. Bu konsullıq yüküdir. Mında müzeyde olacaq Cınğız Dağcınıñ şahsiy eşyalarıdır», – dep qayd etti Smedlâyev Qırım.Aqiqat saytına.

Onıñ malümatına köre, keçken sene Ukraina havfsızlıq hızmetiniñ hadimleri yükni teşkerip, «bir de bir cinayet tapmadılar».

«Uquq qoruyıcı organlarnıñ areketleri «Qırım» Fonduna mahkeme işlerinen oğraşmağa imkân bermey: mal-mülkini aldılar, para cezasını belgilediler – hayriye teşkilât qanun aqlarını imaye etmege yetiştirmesin dep, yapalar», – dep tüşüne Qurultay MSK reisi.

Qırımtatar Milliy Meclisiniñ tışqı alâqalar bölüginiñ reisi Ali Hamzin de «Qırım» Fondu» HT reisine qarşı FSB areketlerini «yañlış» dep adladı. «2011 senesi Cınğız Dağcını Qırımda defn etüv, em de onıñ eşyalarınıñ ketirilmesi – Türkiye ve Ukraina arasında devletlerara añlaşmadır, onıñ içün bu sualni Riza Şevkiyevge degil, bu taraflarğa bermeli», – dedi Hamzin.

Qırım FSB idaresi hastahane tintüvini izaatlamay.

XS
SM
MD
LG