Sürgünlik yerlerinden qaytqan qırımtatarlar Federal migratsion hızmetine muracaat etip, ciddiy problemalarğa rastkele. Olarnı Qırımnı terk etmege çağıralar.
Bunı İnsan aqları boyunca Qırım alan missiyasınıñ uquq qorçalayıcıları bildire.
Teşkilât bildirgenine köre, bunıñ kibi vatandaşlar migratsion statusnı alıp olamay. Qırımtatarlarnıñ vekilleri bildire ki, al-azırda Qırımda bunıñ kibi insanlarnıñ sayısı tahminen 4 biñni teşkil ete.
90 kün keçken soñ olarğa nisbeten qarar çıqarılıp, yarımadanı terk etmege çağıralar.
«Bu Rusiye Prezidentiniñ 2014 senesi aprel 21-ne ait №268 «Ermeni, bulğar, yunan, qırımtatar ve alman halqlarınıñ reabilitatsiya tedbirleri ve olarnıñ ğayrıdan tiklenmesine devlet qoltutuvı ve Qırım akimiyetiniñ sürgünlikten qaytqanlarnı qabul etmek azır olğanı aqqında» emirge ters kele», – dep qayd ete Qırım alan missiyası.
«Mesele şunda ki, Asiyada bütün mal-mülkini satqan adamlarnıñ qaytacaq yeri yoq. Olar mahkemege muracaat etip, Rusiye vatandaşlığınıñ berilmesini talap eteler, lâkin, QAM malümatına köre, birinci mahkemede bile davanı kimse qazanmadı. Şimdi ekinci instantsiya mahkemeleri kete. Eñ azından bir qoranta ekinci instantsiya mahkemesinde aqlarını qorçaladı», – dep ayta QAM reis muavini Dmitriy Makarov.
Aynı problemlerge Qırımda çoqtan berli yaşağan adamlar da oğraylar, şimdi olar bunı tasdıqlap olamay ekenler.
«Böyle adamlar mahkeme vastasınen Qırımda yaşağanlarını isbatlamaq kerekler. Esas mesele şunda ki, mahkeme muracaatınıñ sebebi FMSniñ vesiqa bermek red etmesi ola bile», – dep ayttı QAM alan iş koordinatorı Aleksandra Krılenkova.
Bazarertesi künü, dekabr 15-te, Qırımnıñ öz başına ilân etilgen Qırım baş naziri Sergey Aksönov elektron nevbetlerni qullanıp, FMS bölüklerinde olğan nevbetler meselesini al etmege avale etti.
