Kiyev – Qırımlılarnıñ qıtaiy Ukraina ile memuriy sıñırda qabarcılıq ve qanunsızlıqqa rastkelgen vaqıtları keçmişte qala. Ukraina Devlet sıñır hızmetiniñ reberligi bildire ki, adamlarnıñ bir sıra muracaatları baqıldı, bundan soñra içki teşkerüvler keçirilip, qabar alğan ve vazifesini becerip olamağan hadimler işten boşatıldı. Bundan ğayrı, al-azırda Ukraina Devlet sıñır hızmeti memuriy sıñırdan keçüv qaidelerini azırlap, ileride olarnı Qırımğa qatnağan trenlerniñ er bir vagonında asmağa vade ete.
Qırım ile sıñırda vesiqalar teşkerilip başlağan soñ ukrain sıñırcılarından şikâyet etip başladılar. Yolcularnıñ aytqanına köre, olarnı sebepsiz trenlerden çıqara ediler, qoşma vesiqalar talap etip, eşyalarını baqtılar ve qabar alğan ediler. Uquq qorçalayıcılar memuriy sıñırda bozuvlarnen oğraşıp başladılar ve noyabr soñunda bunıñ ilk neticeleri sezildi. Memleketniñ qıtaiy qısmına kirgen qırımlılarnıñ sıñırcılardan şikâyetleri qat-qat eksildi.
Ukraina Devlet sıñır hızmeti qabarcılardan temizlendi
Ukraina Devlet sıñır hızmetiniñ reberligi bildirdi ki, hadimlernen keçirilgen iş sıñırda nizam olmasına yardım etti. Hızmetniñ matbuat kâtibi Oleg Slobodân Qırım.Aqiqatqa bergen malümatına köre, qıtaiy Ukrainağa kirgen vatandaşlardan umumen 219 şikâyet keldi.
«Olardan 36 şikâyet qabarnen bağlı edi, 10 – çirkin areketler ve 56 şikâyet suniy nevbetlernen bağlı edi», – dedi Ukraina Devlet sıñır hızmetiniñ vekili.
Devlet sıñır hızmetiniñ reberligi bu şikâyetlerge sert yanaşıp, büyük bir içki teşkerüvler keçirdi.
«İçki havfsızlıq idaresi 197 teşkerüv keçirdi. Qayd etilgen 202 bozuv yuqarı reberlikke yetkizildi. 106 iş taqiqatı ve 96 iş teşkerüvi belgilendi. Olarnıñ neticesine köre eki arbiyniñ malümatları Herson prokuraturasına berildi», – dedi Slobodân.
Onıñ aytqanına köre, 234 insan nizam mesüliyetine çekildi, 2 insan işten boşatıldı, 32 hadim diger bölüklerge avuştırıldı ve 57 arbiy sıñır nezaretinden çekildi. Ukraina Devlet sıñır hızmetiniñ reberligi bildire ki, teşkerüvler devam etecek.
Kiriş qaideleri açıq olacaq
Devlet sıñır hızmeti sıñırdan keçüv qaidelerini açıq-aydın yapmaq içün bir sıra vesiqalarnı azırlaycaq ola. Bu işke memurlar İnsan aqları Ukraina Helsinki birligi ve diger cemaat teşkilâtlarınıñ vekillerini celp etecekler.
«Bizler memuriy sıñırdan keçken vatandaşlarnıñ aqları ve sıñırcılarnıñ vekâleti ile vesiqa azırladıq. Ümüt etem ki, onı tren ve vokzallarda, maşina nezaret noqtalarında yerleştirilecek», – dep ayttı İnsan aqları Ukraina Helsinki birliginiñ esperti Sergey Zayats Qırım.Aqiqat saytına.
Onıñ qayd etkenine köre, uquq qorçalayıcı teşkilâtlarnıñ uquqçıları ve sıñır hızmetiniñ reberligi qıtaiy Ukrainağa kiriş yasağı aqqında nizamname azırlaycaqlar.
«Bu yazma bir vesiqa olacaq, onıñ içinde kiriş yasağınıñ sebepleri aydınlatılacaq. Böylece insan yasaq sebebini ögrenip, sıñır hızmetiniñ hadimler areketlerinden şikâyet ete bilecek», – dedi uquqçı.
Uquq qorçalayıcınıñ aytqanına köre, sıñırcı kiriş yasağı aqqında aytsa, bunı tasdıqlağan vesiqanı köstermek kerek, böyle etip qanunsız areketler yapıp olamaz.
«Adsız sıñırcılar trenden çıqarıp, keri yollay ediler. Endiden soñ bunı belli bir adam yapacaq. Ve onıñ qararı qanunsız olsa, ondan şikâyet etecekler, sıñırcını ise cezalaycaqlar», – dedi Zayets.
Uquq qorçalayıcılar ve Ukraina Devlet sıñır hızmeti qıtağa kirüv qaideleri ve yolcu ve sıñır hızmeti hadimleriniñ aqlarını belgilegen Qırım ile memuriy sıñırdan keçüv nizamnamesini azırlaylar. Şimdi olar çetel pasportını kösterip, Qırımğa kireler, lâkin yaqın zamanda olar Devlet migratsion hızmetinden mahsus izin alacaqlar.
«Vaqtınca işğal etilgen yerge kirmek içün mahsus izin alma tertibini belgilegen vesiqa Nazirler şurası tarafından baqıla», – dedi Ukraina Devlet sıñır hızmetiniñ qayd ve pasport işi bölüginiñ birinci zabiti Vasiliy Barabaş.
Ukraina Devlet sıñır hızmeti reberliginiñ tahminlerine köre, yarımada ile sıñırdan keçüv ve Qırımğa kirişnen bağlı vesiqalar dekabrniñ üçünci aftasında tasdıqlanacaq.
