Ğayıp olayatqan halqlar cemiyeti qırımtatarlarğa İnsan aqları kününde tedbir keçirilmesini yasaq etken Qırım akimiyetiniñ areketlerine açuvlanıp, Rusiye prezidenti Vladimir Putinge qırımtatar halqınıñ aq-uquqları ve serbestligini temin etüv talaplar rezolütsiyasını yolladı.
Qırım.Aqiqat saytınıñ elinde olğan rezolütsiyada qırımtatar halqı ve onıñ liderlerine yapılğan basqı aydınlatıla.
Teşkilât Rusiye akimiyeti qırımtatalarğa yarımadada kefil etken havfsızlıq yerine ketirilmegenini qayd etti.
«İnsan aqlarınıñ vahşiyce bozulması acele sürette toqtatılmaq kerek. Qrımtatarlarnıñ öldürüvi boyunca tolu, acele ve mustaqil taqiqat keçirilmeli. Cinayetçiler cezalanmaq kerek. Mustafa Cemilev ve Meclis reisi Refat Çubarovnıñ Qırımğa kiriş yasağı lâğu etilmek kerek», – aytıla beyanatta.
Talaplar arasında serbest toplaşuv aqqı da qayd etile.
«Bu problemlerni çezmek içün qırımtatar halqınıñ vekilleri – Meclis azaları ve Rusiye tarafı arasında doğru ve konstruktiv dialog olmalı», – dep tüşüneler teşkilâtta.
Ğayıp olayatqan halqlar cemiyeti böyle bir dialog qurulmasına issesini qoşmağa azır.
İşğal etilgen Qırımnıñ Rusiye akimiyeti dekabr 10-da İnsan aqlarını qoruv künü munasebetinen Aqmescitte bir de bir kütleviy tedbir keçirilmesini yasaq etken edi.
Rusiye quvet strukturalarınıñ hadimleri Qırımtatar Milliy Meclisini ve qırımtatar cemaat teşkilâtlarını mezkür tedbirler keçirilmesi içün mesüliyet aqqında tenbiyelediler. Aqmescit merkezinde politsiya ve mahsus hızmetler hadimleriniñ sayısı arttı.
Qırımtatar halqınıñ aq-uquqlarını qorçalav komitetiniñ koordinatorları matbuat konferentsiyasını toplap, mezkür yasaqlarnen bağlı muracaatnı Rusiye Federatsiyasınıñ insan aqlarından vekâletlisi, prokuratura ve mahkemege bereceklerini bildirdiler.
Faaller miting keçirilmesinden vazgeçip, akimiyetniñ iznini beklemege qarar aldılar.
