Link açıqlığı

İşğal etilgen Qırımnıñ rusiyeli akimiyeti dekabr 10-da Halqara insan aqları kününe bağışlanğan kütleviy tedbirlerniñ keçirilmesini yasaq etti. Rusiye uquq qoruycı strukturalarınıñ hadimleri Qırımtatar milliy Meclis temsilcilerini ve qırımtatar cemaat teşkilâtlarını mitingge çıqmaq ıntıluvları aqqında tenbiyeledi. Aqmescit merkezine politsiya ve mahsus hızmetlerniñ qoşma quvetleri kirsetildi.

İşğal etilgen Qırımda 2014 senesi dekabr 10 kününiñ adiseleri.

Qırımtatar faallerine insan aqlarını qoruv munasebeti ile mitingni keçirmege izin bermediler

Qırımtatar falleri devlet akimiyet organları tarafından vatandaşlarnıñ anayasa uquqlarınıñ bozuluvına qarşılığını köstermek maqsadı ile dekabr 10 kününe planlaştırılğan mitingniñ keçirilmesinden vazgeçtiler ve numayışqa akimiyetniñ resmiy iznini talap etmege tırışacaqlar.

Bu aqta Qırımtatar halqınıñ aqlarını qoruv komitetiniñ koordinatorı Eskender Bariyev bildirdi, dep haber ete Qırım.Aqiqat mühbiri.

Bariyev şunı da bildirdi ki, teşkilât mitingniñ keçirilmesine resmiy musaadeni talap etecektir. Bundan da ğayrı, faalli yerli akimiyetniñ qanunsız areketleri sebebinden mahkemege muracaat etecek ola.

«Biz bir de bir insan ile degil de, aq ve qıymetlerimiz oğrunda küreşemiz», – dedi Komitetniñ yolbaşçısı.

Qırımtatar halqınıñ aqlarını qoruv Komitetiniñ koordinatorlarına matbuat-konferentsiyasında zelönka septirdiler

Qırımtatar halqınıñ aqlarını qoruv Komitetiniñ koordinatorları – Eskender Bariyev, Sinaver Kadırov ve Abmecit Suleymanovğa Aqmescitte keçirilgen matbuat köneferentsiyası devamında zelönka septirdiler, dep haber ete Qırım.Aqiqat mühbiri.

Tarikçi, konferentsiyağa keder etecek olıp, küfür sözlerni aytır eken, faallerge zelönkanı septirdi.

Qırım.Aqiqat mühbiri aytqanı kibi, tarikni meydanğa ketirgen erkek Eyvaz Ümerov – Mecilske muhalif küçlerniñ tarafdarı, sabıq faalli, şimdi ise, Bariyevniñ aytqanı kibi, Sudaq şeer başı namzeti ola.

Komitet koordinatorları işbu adise boyunca uquq qoruyıcı organlarına ariza yazdılar, politsiya çalışmaqtadır.

Qırımtatar faalleri insan aqlarını qoruv mitinginiñ yasaq etilmesi sebebinden mahkemege muracaat etecek olalar

Qırımtatar faalleri insan aqlarını qoruvı munasebeti ile miting keçirilmesiniñ yasaq olğanı sebebinden mahkemelerge muracaatlarnı azırlay

Aqmescitte dekabr 10 künü Halqara insan aqları Kününe bağışlanğan miting

keçirilmesiniñ yasaq etilgeni sebebinden qırımtatar halqınıñ aqları qoruvı boyunca Komitet Rusiye Federatsiyasınıñ insan aqları boyunca Vekâletli şahıs, mahkeme ve prokuraturağa muracaat etecek ola.


Bunı Komitet azaları çarşenbe künü Aqmescitte keçirilgen matbuat-konferentsiyasında bildirdi, dep haber ete Qırım.Aqiqat mühbiri.

Olarnıñ malümatına köre, Halqara insan aqları kününde «Qırım – Vatanım» mevzusında resimler yarışı, «Milliy areketniñ uquq qoruyıcı faaliyeti» serlevalı fotoserginiñ ve «Qırımda insan aqları: mesele ve perspektivalar» mevzusında konferentsiyanıñ keçirilmesi planlaştırıla edi.

Faqat Aqmescit akimiyeti işbu tedbirlerni şeerniñ merkezinde keçirmege izin bermedi. Faallilerge diger yerlerni teklif ettiler, olardan biri – Zenaat birligi medeniyet evi yanındaki meydan oldı.

Komitetniñ koordinatorları aytqanı kibi, teşkilât tedbirlerniñ işbu yerde keçirilmesi içün arizanı yollap, kene de menfiy cevap alğan edi.

«Qırım akimiyeti insan aqlarına bağışlanğan numayışlardan qorqa, bu – qırımtatarlarğa nisbeten devam etken genotsidniñ bir delili ola: konferentsiya, sergi, bala resimleri, numayışlardan qorqalar…»,– dedi Komitetniñ koordinatorı, Qırımtatar Milliy Meclis azası Eskender Bariyev.

Aqmescit merkezini OMON ve «samooborona» sarıp aldı, şeer sakinlerini metallodetektor vastasınen teşkereler

Çarşenbe künü, dekabr 10-da, İnsan aqlarını qoruv kününde, Aqmescit merkezini arbiyler sarıp aldı.

Qırım.Aqiqat mühbiriniñ malümatına köre, Lenin meydanında OMON, politsiya, em de «halq imayesi» vekilleri buluna.

Arbiylerniñ büyük qısmı Qırım Nazirler şurasınıñ binası yanında tura.

Meydan kirişi ve çıqışında metallodetektorlar bar. Şeerniñ merkeziy soqaqları ve er bir çarpazında DPS hadimleri buluna. Merkezge qomşu soqaqlardan da irişim yoq edi.

Matbuat vastalarınıñ vekillerine meydannı terk etmege tevsiye eteler, fotograflardan ise çıqarğan fotoresimlerni silmege talap eteler.

Eskender Bariyev: kendi aqları içün mitingge çıqacaq olğan qırımlılarnı qorquzalar

Aqmescit memuriyeti insan aqlarını qoruv tedbirler keçirilmesini yasaq etip, Rusiye Federatsiyasınıñ Anayasası ve №54 Federal qanunını boza, dep aytalar Qırımtatar halqı aqlarını qoruv komitetinde.

Teşkilât koordinatorı, Qırımtatar Milliy Meclis azası Eskender Bariyev Qırım.Aqiqatqa bergen malümatına köre, dekabr 10-da insan aqlarını qoruv tedbirlerinde iştirak etecek olğan qırımlılarnı qorquzalar.

«Rusiye Federatsiyası ve halqara uquq qanunlarını bozıp, Komitetke insan aqlarına dair tedbirler keçirilmesini yasaq eteler. Prokuratura vekilleri memuriyet bozuvlarını körmeyip, sakinlerni cezalarnen qorquza», – dep qayd etti o.

Komitette hatırlattılar ki, noyabr 28-de teşkilât Aqmescit yolbaşçılığına mektüp yollap, 2014 senesi dekabr 10-da Halqara insan aqları künü munasebetinen tedbir keçirecegini bildirdi. Dekabr 5-te Komitet Qırımda insan aqlarını bozuvğa qarşı piket keçirecegini bildirdi, dekabr 9-da ise piket yeriniñ belgilenmesi içün mektüp yolladı.

Lâkin faallerge tedbir keçirmege bermeyler, «prokuratura» ise planlaştırılğan aktsiyalar keçirilmesiniñ yasağı aqqında tenbiyeledi.

Komitet koordinatorları dekabr 10-da saat 11:30 (yerli saat) Aqmescitteki Çehov, 20 adresi boyunca matbuat konferentsiyasını keçirip, jurnalistlerni nevbetteki adımlarınen tanış etecek olalar.

«Prokuratura» qırımtatar faallerini taqip etip, miting keçirilmesiniñ yasağı aqqında qavehanede tenbiyeledi

Qırımda «prokuratura», FSB ve MVD hadimleri Qırımtatar halqı aqlarını qoruv komitetiniñ koordinatorları bulunğan qavehanege kelip, dekabr 10-da İnsan aqlarını qoruv kününde mitingler keçirilmesiniñ yasağı aqqında ihtar ettiler.

Bunıñnen bağlı videonı faal, Qırımtatar Milliy Qurultayı Teftiş komissiyasınıñ sabıq azası Kurtseit Abdullayev Facebook saifesinde yerleştirdi.

Onıñ aytqanına köre, buña baqmadan, çarşenbe künü, dekabr 10-da, yerli saatke köre üylede, Aqmescitteki Kiyevskaya soqağındaki Zenaat birlikleri evi yanında devlet akimiyetiniñ vatandaşlarnıñ Anayasa aqlarını bozğanına qarşı narazılıq aktsiyası ötkerilecek.

Komitet koordinatorı, Qırımtatar Milliy Meclis azası Eskender Bariyev dedi ki, «prokuratura» ve FSB hadimleriniñ qavehanege kelmesi Qırım faalleri taqip etilgenini ifadeley.

«Bugün bulunğan qavehanege prokuratura, MVD ve FSB hadimleriniñ kelmesi telefonlarımıznı diñlegenlerini ve taqip etilgenimizni isbatlay. Halqara insan aqları kününi keçirmege bermemek içün mına böyle olmaycaq sebepler», – dep yazdı o.

«Prokuratura» ve Aqmescit politsiyası Qırımtatar halqı aqlarını qoruv komitetini dekabr 10-da Halqara insan aqları kününde miting keçirilmesiniñ yasağı aqqında tenbiyeledi.

Çubarov: ilk sefer Qırımda İnsan aqları kününde tedbir keçirilmesi yasaq etildi

Qırımtatar Milliy Meclis reisi Refat Çubarov Qırımğa kirip olamağanında sebep ilk sefer İnsan aqlarını qoruv kününi Vatanından tış qayd etmege mecbur.

Bunı o Facebook saifesinde yazdı.

Aynı vaqıtta o, yarımadada qırımtatar halqına yapılğan basqı ve yasaqlarnı qayd etti.

«Soñki yıllar devamında ilk sefer İnsan aqları kününi Vatanımdan uzaq bir yerde qarşılayım... İlk sefer Qırımnıñ şimdiki akimiyeti İnsan aqları künü munasebetinen kütleviy tedbirler keçirilmesini yasaq etti... İlk sefer İnsan aqları kününde Qırımtatar Milliy Meclis azasını (bu sefer menim muavinim Ahtem Çiygoznı) sorğuğa çekeler...», – dep yazdı Çubarov.

Meclis reisi «qomşularnen barışıq içinde yaşama printsiplerinden keçkenlerni» ceza beklegenini ayta.

«Halqara vaqialar tecribesi köstere ki, qomşularnen barışıq içinde yaşama printsiplerinden keçken bütün insanlarnı ceza bekley. Demek ki, tezden bizler Mahsus halqara mahkemeniñ maznunlar yerinde bizge tanış olğan Qırım betlerini (ilk sefer) körecekmiz...», – dep yaza Çubarov.

Qırımtatar Milliy Meclis reisiniñ muavini sorğuğa çağırıldı

Qırımtatar Milliy Meclis reisiniñ muavini Ahtem Çiygoz Rusiye Taqiqat Komitetiniñ qırım idaresine şaat olaraq sorğuğa çağırıldı.

Çiygoznıñ aytqanı kibi, taqiqatçı ile körüşüv dekabr 10 künü yerli vaqıt boyunca saat 15:00 olmalı edi. Muzakereniñ tahmin etilgen mevzusı – mayıs 3 künü keçirilgen narazılıq numayışları.

«Maña telefon açıp, mayıs 3 künü işi boyunсa Taqiqat komitetke çağırdılar. Mıtlaqa kelecegimni bildirdim. Taqiqatçı ile çarşenbe künü saat üçke añlaştıq»,– dedi Çiygoz.

O şunı da qayd etti ki, soñki zamanları qırımtatarlarğa nisbeten etilgen yaqalav ve cezalarnı köz ögüne alıp, «bu kibi tedbirlerniñ qanuniy olğanına» ümüt beslemege mümkün degil.

«Neni bekleyіm? Vatandaşlarımıznı qanunsız sürette cezalaylar, «sımarış ile» yaqalaylar, men, elbette ki, bu kibi tedbirlernin qanuniy olğanını aytıp olamayım. Şunıñ içün özüm işbu Taqiqat komitetke ketem, soñra ise ne olacağını Allah bile», – dedi Çiygoz.

2014 senesi mayıs 3 künü Mustafa Cemilevni Qırımğa kirsetmediler. Bu sebepten qırımtatarlar Ermeni Bazarnıñ «sıñırında» narazılıq aktsiyanı keçirdiler.

Bundan soñ Qırım «prokurorı» Natalya Poklonskaya Meclis reisi Refat Çubarovğa «ekstremist faaliyetiniñ yasaq etilgeni» aqqında tenbiyeni oqudı. Aks alda Meclis yoq etilecegini qayd etti Soğra narazılıq iştirakçilerine nisbeten mahkeme toplaşuvları keçirildi, neticede insanlarğa para cezalarını belgilediler.

Küzde yarımadada mayıs 3 künü işi boyunca yaqalavlarnıñ yañı dalğası yüz berdi.

Dekabr 10 künü işğal etilgen Qırımda qırımtatar faalleri Halqara insan aqları kününe bağışlanğan adetiy mitingni keçirmege planlaştıra ediler.

Bu sene mayıs aynda Qırımtatar Milliy Meclisine Aqmescit merkezinde sürgünlik yıllığı munasebeti ile matem mitngini keçirmege ilk sefer yasaq ettiler.

XS
SM
MD
LG