Birinci rusiye telekanalında «Faqat» programmasınıñ alıp barıcısı Mihail Leontyev aytqanı kibi, Ukraina ve Gürcistan birinci olaraq Ukrainağa ücüm ettiler. «Novorossiya TV» kanalında «hunta canavarlığı» aqqında belli «gastrolci» tarif etti.
İsrail telekorüviniñ «9 kanal»ı Birinci rusiye telekanalınıñ «Faqat» programmasınıñ alıp barıcısı ile subetleşti.
Bu kibi intervyü içün soñki zamanları arbiy stsenariy aqqında laflarnıñ çoq olması sebep oldı. Yaqında, misal içün, «VTB bank»nıñ yolbaşçısı Andrey Köstin alman neşirine Rusiye banklarnıñ SWIFT halqara ödev tertibatından ayırılması cenkni belgileycegi aqqında bildirdi.
Mihail Leontyev aytqanı kibi, Ukraina ve Gürcistan Rusiyege ücüm etti: «Siz İsrail jurnalisti olasıñızmı? Siz kereçketen de Rusiye Qırımnı işğal etkeni ve Ukrainada nasıldır bir separatistlerniñ areket etkeni aqqında ayta bilesiñizmi? Rusiye separatistleri yoqtır… Bizge ücüm ettiler». Onıñ sözlerine köre, bu ameliyat AQŞ tarafından planlaştırılğan bir şey edi, çünki olar «Rusiye ile suvuq cenkni başlamağa ve bunı yapmaq içün «yañı raqiplerni» tapmağa tırışa ekenler.
Jurnalist yaqında olğan saylavlarda Ukraina parlamentine milletçilerniñ keçmegenini hatırlatqanda, Leontyev Ukrainada şimdi «banderler akimiyeti»niñ üküm sürgenini ayttı. O, «Boing»niñ Donbass üzerinde felâketi aqqında da bir qaç söz ayttı ve uçaq separatistlerniñ tarafından urıp tüşürilgeni aqta laflar teşviqat olğanını qayd etti. Buña İsrail telekanalınıñ jurnalisti teşviqat – Birinci rusiye telekanalınıñ oğlançıqnıñ çarmuqqa kerüvi aqqında ikâyesi olğanını ayttı.
Evel Leontyevniñ programmasında sanki dersiñ sputnikten yapılğan bir foto kösterildi. İşbu foto tüşürilgen «Boing» işi boyunca bir delil olmalı edi.
«Aktrisanıñ» qaytıp kelmesi»
«Novorossiya TV» olaraq adlanğan kanal YouTube ağında Donetskte keçirilgen sergi aqqında levhanı kösterdi. «Rusiyede inanç» serlevalı sergi Rusiyede yaşağan pravoslav insanlarnıñ yaşayışına bağışlana ve «ARTDONBASS» bediiy-sergi merkezinde keçe. Saur-Mogilağa ketirilgen muqaddes resim aqqında tarif ettiler.
Süjette aytılğanı kibi, muqaddes resimni Saur-Mogilağa ketirip, Ukrainada neonatsizm ile keçirilgen mucadelede elâk olğanılarnıñ hatırasına pekitilecek abide içün qoyulacaq kapsulada saqlaycaqlar.
İşbu ikonanı saqlağan fondnıñ müdir muavini belli ukrain «gastrolci»si oldı – böyle etip Mariya Tsıpkonı çağıralar. Bu süjette belli «aktrisa» özüni Mariya Vikina olaraq adladı ve «hunta» ile «Pravıy sector» canavarlığı aqqında tarif etti. Amma izaatlarğa köre, seyirciler Mariyanı tanıdılar.
Bu qadın mayıs ayında DHC ve LHC belgilevi boyunca keçirilgen «referendumnıñ idarecisi» edi, iyünde Odessa felâketinde zarar körgen qadın rolüni icra etti. Bunıñ ile Tsıpko Maydanğa qarşı areket etken Donbass sakini, banderlerniñ taqibinden saqlanmağa tırışqan qaçaq olaraq özüni tanıtqan edi.
