Qırımtatar Milliy Meclis reisi Refat Çubarov cumaaqşamı künü, dekabr 4-te, Avropa parlamentiniñ deputatlarını Rusiyeniñ Qırım işğalini tanımayıp, lâkin qırımtatarlarğa birdemlik köstermek içün yarımadanı ziyaret etmege çağırdı. Bunı Refat Çubarov Brüsselde Avropa parlamentiniñ insan aqları komitet toplaşuvında bildirdi, – dep haber ete UNİAN.
«İşğal ne qadar sürecek bilmeyim, lâkin qırımtatarlar bir mücize bekleyler, halqara toplulıq meseleni çezecek, dep ümüt eteler. Halqara missiyanıñ bulunması müimdir, lâkin Moskva şart qoyıp, Qırım tanılmasını istey. Qırımnı Rusiye olaraq tanımayıp, anda bulunmaq kerek», – dedi Refat Çubarov.
O, «Qırımnıñ işğalci akimiyeti dos-doğru repressiyalar yapıp, qırımtatarlarğa zarar ketirgenini» bildirdi.
Refat Çubarov hatırlattı ki, qırımtatarlarnıñ «Qırımğa qaytmasından çoq vaqıt keçmedi», ve şimdi de olar içün yañı telüke peyda oldı.
«Olar referendumğa qarşı açıq-aydın çıqtılar, onıñ içün işğalci akimiyet olarnı taqip ete. Qırımda referendum olmadı. Anda Qırım ealisiniñ 50% bile olmadı. İntiqamdan ğayrı, olar qorquzacaq olalar», – dedi Refat Çubarov.
Onıñ aytqanına köre, «adamlarnı qaçırıp, siyasiy ve din mensüpligine köre öldüreler».
«Bundan evel böyle bir şey yoq edi. Bütün bular aydınlatılğan edi. Rusiye akimiyeti olarnıñ siyasetinen razı olmağanlarnı sürgün ete», – dep ayttı qırımtatarlarnıñ lideri.
Onıñ qayd etkenine köre, Rusiye akimiyeti Qırımda bulunmasını pekitmek içün eki yuzni qullana.
«Lafları ve Qırımdaki vaziyet – bam-başqa şeylerdir. Esas vastalardan biri – parallel strukturalarnı meydanğa ketirmektir: qırımtatarlarnıñ ekseriyeti memnün olmasa, olar «kendi» tatarlarını taparlar», – dep añlattı o.
2014 senesi fevral soñunda mart başında Rusiye ve Rusiyeniñ Qara deñiz flotunda olğan askerler Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
