Link açıqlığı

Anastasiya Mihaylovskaya

Aqmescit – Aqmescitniñ merkezinde yerleşken Qırım akademik ukrain muzıkalı teatriniñ binasını yıqа bileler. Bu teşebbüs ciddiy şekilde Qırım «Devlet şurasında» muzakere etile.

Serlevasından yaqında «ukrain» sözü tüşürilgen 1977 senesi qurulğan bina şeer etrafınıñ bir qısmıdır. Mında yalıñız oyunlar degil de, belli insanlarnıñ kontsertleri de keçirile.

Binanıñ devrilmesi aqqında laf yürütilmesine medeniy asabalıqnıñ qoruvı ve medeniyet boyunca «devlet şurası» komitetiniñ iş taqımı tarafından yapılğan teşkerüvi sebep oldı. Onıñ neticesinde belgilengeni kibi, teatr balkonınıñ alı qazaiydir, 3 tonnalıq avizeler «seyircilerge tüşe bile», diger odalar ise sadece eskidir. Nezaretçilerniñ fikrine köre, avtobus durağı yanındaki asfalt teatrniñ eski mağazından sebep eşile bile.

Teatr müdiri Vladimir Zaugurskiy içün böyle laflar taacip etici bir şey oldı, çünki sentâbr ayında o, Rusiye ve qırım akimiyeti tarafından tamir işleri içün yardımnı bekley edi. Onıñ fikrine köre, yıquv aqqında atta laf olmamaq kerek

Muzıkalı akademik teatrniñ baş müendisi Artur Yakubov da binanıñ qazaiy alı aqqında neticeler pek abartlığanını tüşüne.

- Binanıñ ğayrıdan quruv leyhası 2012-2013 seneleri peyda oldı. Şimdi o qanaatlendirici bir vaziyettedir. Ebet, 40 yıl devamında tamir işleri yapılmağan edi, amma seyirciniñ ayatına telükeli bir şey yoqtır, avizelerimiz de 3 tonnalıq degil. Ebet binanıñ ayırı qısımlarında tamir işlerini keçirmek kerek. Bu, esasen, mağazlar, suv tertibatı ve ilâhre. Teatrniñ er bir hadimi binanı iç te yıqmağa mümkün olmağanını aytır. 260 hadim soñ ne yapacaq? Binanı yıqmaq, maqsatqa uyğan bir şey degildir, menimce. Şeerde 700 insannı sığdıra bilecek başqa bir salon yoqtır.

Amma, teatrniñ yıquvı ile bağlı teşebbüske Aqmescit şeer şurasınıñ reisi Viktor Ageyev endi qol tuttı. «Yañı teatr qurulacaq olsa, buña qarşı degilim. Men bellesem, şeer ve Qırımnıñ sakinleri yañı, oñaytlı teatrniñ qurucılığına qarşı çıqmazlar», – dedi o.

«Hatıranı devirmek kibi bir şey»

Aqmescit sakinleriniñ fikirleri bu meselede farqlıdır. «Teatrni yıuqmağa erte, dep tüşünem. «Mir» kinoteatri yerinde başta qurmaq kerek. Bir şey…», – dey paytahtnıñ sakini Sergey.

Mariya ise Lenin meydanında yañı kontsert salonınıñ qurucılığına qol tuta. «Merkezde daa da diqqat çekici bir şeyni qurmaq mümkün. Aqmescitniñ özüni ğayrıdan qurmaq kerek», – dey o.

Yañı teatrniñ leyhası aqqında aytqanda, onıñ amelge keçirilmegen leyhalarnıñ mezarlığına yol alacağını tahmin etmek mümkün

Rostislav Gayday

Qırımnıñ nam qazanğan mimarı Rostislav Gayday yañı teatrniñ qurucılığı – utopik bir şey olğanını tüşüne. «Menimce, binanı devirmek mümkün degil. Onı yıqmaq ve yañı soyunı qurmaq – hatıranı yıqmaq kibi bir şey. Ne qadar masraf ve vaqıt ketecek, şimdi aytıp olamam, çünki bunı yapmaq içün bazı noqtalarnı incelemek kerek. Amma yañı teatr leyhası aqqında aytacaq olsaq, onıñ amelge keçirilmegen leyhalarnıñ mezarlığına yol alacağını tahmin etmek mümkün», – dedi Gayday.

Sabıq ukrain teatri aqqında laf daa 2011 senesinden yürütile. O vaqıt binanıñ zemaneviyleştirüvi boyunca leyha işlep çıqarıldı. Leyhağa 200 million grivna miqdarında qıymet kesildi, amma Qırımnıñ o vaqıttaki büceti içün bu pek büyük bir para edi.

XS
SM
MD
LG