Link açıqlığı

Keriçte ukrain tilinde yazılğan notarial vesiqalarnıñ tercimesinde aqça qazanalar


Keriçte tibbiy sigortalarnıñ resmiyleştirüvi içün tercime hızmetlerini bergen bürolarda alâ daa ukrain tilinden rusçağa çevireler.

Qırım.Aqiqat mühbirine belli olğanı kibi, şeerniñ tercime hızmetlerini bergen bürolarından birinde rus tiline resmiy tercime, misal içün, ukrain tilinde yazılğan doğuv aqqında şeadetname tercimesiniñ fiyatı 100 ruble tura.

«Sılaq müür ile notarial tercime kerek. Onı tek biz beremiz. Bir qaç kün devamında yapıla. Fiyatı – 100 ruble», – dep bildirdi büro hadimi.

Sigorta şirketlerine rus tiline notarial tercimesi olğan vesiqalarnıñ berilmesini daa yazda lâğu ettiler.

Qırım tibbiy sigorta şirketinden qayd etkenileri kibi, şimdilik vesiqalarnıñ tercimesi mecburiy degil.

«Yañılmasam, ya avgust, ya da sentâbr ayında lâğu ettiler. Amma bayağı insan bunı endi yapqan edi», – dep ayttı şirketniñ hadimi.

Bütün malümatnı şirketniñ hadimleri öz başına ukrain tilinden rus tiline tercime eteler ve tibbiy sigortanıñ elde etilmesine yazılğan arizağa elektron şekilde kirseteler.

Sigorta şirketlerniñ hadimleri aytqanı kibi, qırımlılarnıñ çoqusı alâ daa polislerni elde etmedi.

2015 senesi yanvar 1-den Qırım Rusiye Tibbiy sigorta tertibatına keçe. Oña köre, tibbiy sigorta boyunca tedaviylev ve, aks alda, ekimlerniñ paralı hızmetleri nazarğa alına.

2014 senesi fevral soñunda mart başında Rusiye ve Rusiyeniñ Qara deñiz flotunda olğan askerler Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.

XS
SM
MD
LG