Link açıqlığı

«Biz bir kütük degilmiz, onıñnen delik qapatmazsıñ»: Qırım oquv yurtunda Devlet duması deputatınen razı degiller


Aqmescit – Rusiye Devlet Dumasınıñ deputatları yañı teşkil etilgen Qırım Federal universitetiniñ (QFU) daa bir oquv yurtunı qoşmağa teklif eteler. Bu sefer Qırım pedagogika universitetine köz taşladılar. Bu teşebbüs, Qırım tibbiyet universitetini QFU terkibine kirsetmek muvafaqiyetsiz ıntıluvlardan soñ peyda oldı. QMPu-niñ reberleri Devlet duması deputatlarnıñ teklifine menfiy davrandılar, universitet mustaqil olmaq kerek, deyler.

Hatırlatamız, Qırım federal universiteti Rusiye ükümetiniñ avalesi ile bu sene avgust ayında Vernadskiy adına Tavriya milliy universitetiniñ esasında teşkil etildi. Onıñ terkibine yarımadanıñ 5 oquv yurtu kirdi: Tabiat qoruv ve kurort inşaatı Milliy akademiyası, Qırım agrotehnologik universiteti, Qırım gumanitar universiteti, Qırım iqtisadiyat universiteti, İnformatsion-neşriyat tehnologiyaları Qırım institutı.

Qırım tibbiyet universitetiniñ talebeleri narazılıq bildireler, iyün 17 künü 2014 senesi
Qırım tibbiyet universitetiniñ talebeleri narazılıq bildireler, iyün 17 künü 2014 senesi

Başından, S.İ. Georgiyevskiy adına Qırım devlet tibbiyet universiteti QFU terkibine kirsetilmek kerek edi, amma onıñ reberleri, ocaları, studentler bu teklifni desteklemediler. Oquv yurtnıñ azbarında buña qarşı narazılıq aktsiyaları ötkerildi, ocalar mahsus muracaatnı imzaladılar. Tibbiyet universitetinde eminler, QFU terkibine qoşulsalar, ocalarnıñ bir qısımını işten çıqaracaqlar, em de klinik bazalarını ğayıp olacaq. Qırım «yolbaşçısı» Sergey Aksönov, bu teşebbüs «hata» olğanını tasdiqladı.

«Bürrokratik şekilde yanaştılar»

Kün evelden, Rusiye Devlet Dumasında LDPR fraktsiyası mütehassıslar şurası reisi Vladimir Lisiçkin mühbirlerge bildirgeni kibi, tibbiyet oquv yurtu yerine, iñ terkibine Qırım müendislik pedagogika universitetini qoşmağa teklif etti. Lisiçkin aytqanı kibi, bu teşebbüsnen Devlet dumasınıñ deputatları çıqmağa isteyler, dep bildire «Krımmedia».

Keçken sene QMPU 20 yıllığını qayd etti
Keçken sene QMPU 20 yıllığını qayd etti

«Federal universiteti 14 biñ studentten ibaret olmaq kerek. Tibbiyet universitetinde - 5 biñ talebe. Deñiştirmeler kirsetmek mümkün. Qırım müendislik pedagogia universiteti bar, anda da 5 biñ student bar. Onı tibbiyet universiteti yerine teklif etmek mümkün», – dep añlattı deputat.

Lisiçkinniñ fikirince, bu qarar mantıqlı olacaq, dediler. «Bu universitet (QMPU. – Müel. qaydl.) çeşit zenaatlar boyunca talebelerni azırlay. Ve onı tibbiyet universiteti yerine qoşmaq mantıqlı olur edi. Biz bu variantnı ögrenmedik. Men Moskvağa qaytqan soñ. bu aqta ükümetke yazacaqmız», – dedi Lisiçkin.

«Biz – canlı organism»

Qırım müendislik pedagogika universitetinde Devlet duması deputatları teşebüsine menfiy davrandılar.

Qırım.Aqiqat ile subetleşken rektor Fevzi Yakubov, Lisiçkin ünivesitet ocalarınen körüşmeyip, bildirgen teklifi sebebinden çorlandı. «Federal universitetiniñ qaidelerine köre, bu universitet cemiyetine oquv yurtlar göñülli olaraq kirmek kerekler. O da, (Lisiçkin – Müel. qaydl.) men kelip, Lisiçkin LDPR firqasında degil, «Yedinaya Rossiya» firqasında çalışmaq kerek, desem begenmez edi», – dep añlattı Yakubov.

Qırım Federal universiteti tertip etilgende, QMPU-niñ bu aqta fikiri bildirilgen edi. «Biz hususan Qırım universiteti olamız. Tasil sistemasını hadimlernen temin etemiz: bala bağçaları, mektep, oquv yurtları, diger müessiseler. İhtisas, sanaat ile bağlı zenaatlar - episi Qırımğa ait», – dep qayd etti Yakubov.

Fevzi Yakubov
Fevzi Yakubov

Qayd etkenine köre, 20 yıl evelsi, oquv yurtu avdet etken sürgün etilgen halqlarnı közge alıp meydanğa ketirilgen edi. «Şimdi bizim universitetimiz eki medeniyetniñ birleşüvini temsil ete: türkiy ve slavân, amma aynı zamanda bizim oquv yurtumızda qırımtatar halqınıñ tiklenüvi boyunca işler alıp barıla. Bu sebepten, universitetimizde bir sıra zenaatlar teşkil etildi: qırımtatar tili, edebiyatı, tarih, başlanğç tasil, milliy-ameliy sanaat, meslekler – bunıñ episi qırımtatar halqınıñ tiklenüvinen bağlı», – dep añlattı Yakubov.

«Biz kütük degilmiz, bizim ile deliklerni qapatmazlar. Biz - canlı organizm, meraqlı, Qırımğa, cemiyetke fayda ketiremiz. Menimce, bizim universitetimiz mustaqil olıp, inkişaf etmeli», – dep ayttı QMUu-niñ rektorı.

Yakubovnıñ sözlerine köre, maliye ve diger ihtiyaclar qapatılsa bile, bu teklifnen razı olmaz. «Bu vaziyette, men olarğa böyle cevap bererim, biz siznen tasil ve ilim tilinde degil, ticaret tilinde laqırdı etemiz. Amma, biz ticaret teşkilâtı degilmiz. Biz - ilim, tasil müessise olamız, keliñiz, bu tilde laf eteyik. Yardım etmege isteseñiz, ayırıca yardım etiñiz», – dedi rektor.

Yakubov qayd etkeni kibi, Devlet duması deputatı ile körüşmege azır olğanını ayttı.

XS
SM
MD
LG