Rusiye Federatsiyası işğal etilgen Qırımda insan aq-uquqlarına qarşı yapılğan cinayetler içün mesülietlidir. Bunı Qırımtatar Milliy Meclis reisi Refat Çubarov yaqınlaşqan İnsan aqları künü munasebetinen bildirdi.
«1948 senesi dekabr 10-da Birleşken Milletler Teşkilâtınıñ Baş Assambleyası insan aqları Umumiy deklaratsiyasını qabul etti. Er sene, 1950 senesinden itibaren, dekabr 10-da halqara toplulıq İnsan aqları kününi qayd ete.
Bu hatıra künü qırımtatar milliy areketi içün de ğayet müim ola. Qırımtatar milliy areket faalleriniñ sürgünlik zamanında İnsan aqları kününe diqqat etmesi qırımtatar halqınıñ Vatanına avdet olması devamında yañı şekillerni aldı», – dep yaza Çubarov.
Meclis reisiniñ qayd etkenine köre, bu künü Qırımtatar Milliy Meclisi ve qırımtatar cemaat teşkilâtları keçirgen kütleviy tedbirlerde Qırımnıñ farqlı millet vekilleri faal sürette iştirak etken ediler.
«Qırımtatarlar qırımtatar halqınıñ aq-uquqları oğrunda zorbalıqsız küreşip, insan aqları ve bütün halqlarnıñ Vatanında serbest yaşamalarına qol tutalar.
Rusiye Federatsiyasınıñ Qırım işğali Qırım toprağında halqara uquq tarafından insaniyetlikke qarşı yapılğan cinayet olaraq tanılğan deşetli içtimaiy adiselerni asıl etti: insanlarnı esir aluv ve öldürüv, kütleviy ve qanunsız tintüv, apiske aluv, mahkeme taqibi ve milliy, diniy ve siyasiy mensüplikke köre repressiyalar.
İşğal akimiyeti tamır qırımtatar halqına basqı etip, onı Vatanını terk etmege mecbur ete. Bunıñ kibi siyasetni amelge keçirüv qırımtatar halqınıñ milliy lideri Mustafa Cemilev, Qırımtatar Milliy Meclis reisi Refat Çubarov ve Meclis reisiniñ mesleatçısı İsmet Yükselniñ Qırımğa kiriş yasağınen başladı.
Halqara gumanitar uquğına binaen, işğal etilgen Qırımda insan aqlarına qarşı yapılğan cinayetler içün bütün mesüliet Rusiye Federatsiyasına aittir.
Bu vaziyette Qırımtatar Milliy Meclis reisi olaraq 2014 senesi dekabr 10-da İnsan aqları künü munasebetinen tedbir keçirecek olğan qırımtatar teşkilâtlar içün esas şiarlarnı ilân etem:
– «Qırımda repressiya ve quvğunlıqlarğa yoq deymiz!»,
– «Adalet ve insan itibarı qırımtatarlarğa da mensüp!»,
– BMT aza devletleriniñ ükümetleri ve parlamentleri! Qırımda tamır qırımtatar halqınıñ telükesiz yaşayışını temin etecek ve onıñ aqlarını qoruycaq semereli areketlerniñ yapılması kerek»,
– «Qırımtatar Milliy Meclisi – qırımtatar halqınıñ yuqarı temsil organına – Qırım meseleleri boyunca halqara muzakerlerniñ subyekti statusı berilmeli».
Qırımda 2014 senesi dekabr 10-da İnsan aqları künü munasebetinen qırımtatar teşkilâtları keçirecek tedbirler Qırımtatar Milliy Meclisinen muzakere etilecek, Qırımdan tış – Kiyevdeki Qırımtatar Milliy Meclis temsilciliginen», – dep yazdı Çubarov.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne AQŞ neticelerni tanımadı ve bunı Rusiye tarafından Qırımnıñ işğali olaraq sayalar.
