Link açıqlığı

Halq deputatı: Rusiye baş prokuraturası Qırımnıñ siyasiy mahbüslerini Ukraina vatandaşları olaraq tanıdı


Rusiye Baş prokuraturası Rusiyede Qırım yarımadasında terakt azırlamasında qabaatlanğan Qırımnıñ siyasiy mahbüsleri – ukrain rejissöri Oleg Sentsov, faal Aleksandr Kolçenko, Aleksey Çirniy ve Gennadiy Afanasyevni Ukraina vatandaşları olaraq tanıdı.

Bu aqqında Rusiye Baş prokuraturasınıñ Ukraina halq deputatı Aleksandr Briginetsniñ muracaatına kelgen cevabında aytıla. Bunı Briginets Facebook saifesinde bildirdi.

«Hatırlatam, mahkeme apiske alınğan dört kişini Rusiye vatandaşları dep saya (çünki olar Rusiye vatandaşlığından vazgeçmeyip, avtomatik sürette Rusiye vatandaşlığını qabul ettiler), bunıñ içün olarğa Ukraina diplomatlarınen körüşmege imkân berilmey. Yaqalanğanlar ise Ukraina vatandaşları olğanını ve Rusiye vatandaşlığını qabul etmegenlerini bildireler», – dep yaza Briginets.

Deputatnıñ aytqanına köre, o, Rusiye Baş prokuraturasına muracaatta bulunıp, Qırımnıñ siyasiy mahbüsleriniñ alı ve bulunuv yeri, em de 2014 senesi yanvar ayından itibaren yaqalanğan Ukraina vatandaşları ve olarnıñ qabaatı nede olğanı aqqına malümat bermege rica etti.

«Cevapta aytılğanına köre, keçirilgen teşkerüv neticelerine binaen, mezkür şahıslarnı qanunsız yaqalav ve cinaiy mesülietke çeküv, em de sebepsiz apis cezası boyunca malümat tasdıqlanmadı. Ve prokuratura kirişmesiniñ sebebi yoq», – dep bildire Briginets.

Mayıs ayında FSB hadimleri Aqmescitte Oleg Sentsov ve Aleksandr Kolçenkonı, em de Ukrainanıñ daa bir qaç vatandaşını yaqaladılar. Olarnı Qırımda terakt azırlanmasında qabaatlaylar.

Sentâbr 29-da Moskvanıñ Lefortovo rayon mahkemesi onıñ apis müddetini üç ayğa arttırdı – 2015 senesi yanvar 11-ne qadar. Oktâbr 24-te Moskva şeer mahkemesi Sentsovnıñ apis müddetini arttırmaq qararını doğru dep tanıdı.

Bundan evel oktâbr 20-de Moskva şeer mahkemesi qırımlı Aleksandr Kolçenkonıñ apis müddetini 2015 senesi yanvar 11-ne qadar arttırmaq qararını qanuniy dep tanıdı.

Qırımlılarnıñ adliyecileri ise olarnıñ apiste qalmasını sebepsiz dep tanıylar.

XS
SM
MD
LG