Link açıqlığı

Kiyev sakinlerini qırımtatar yemekleri ve medeniyetinen tanış ettiler


Kiyev sakinlerini qırımtatar yemekleri ve medeniyetinen tanış ettiler

Kiyev – Oktâbrniñ 31-nde İvan Gonçar adına Kiyev müzeyinde Türkiy tiller ve medeniyetler aftasınıñ tantanalı qapatıluv merasimi ötkerildi. Tedbir devamında şarqiy yemeklerniñ azırlavı boyunca ustalıq dersleri, bayram kontserti teşkil etildi. Kelgen musafirler qırımtatar medeniyetinen de yaqınca tanış oldılar. Qırımnıñ tamır halqınıñ yemekleri, oyun ve avalarınen bu sene Kiyev milliy universitetinde açılğan «qırımtatar filologiyası» talebelri tanış ettiler.

«Bizim tedbirimiz Ukrainada temsil etilgen türkiy tillerge bağışlana. Bu ğaye universitetimizde - «qırımtatar tili ve edebiyatı, tercimanlıq» bölügüniñ açıluvı sayesinde peyda oldı. Bizim şarqiy tiller filologiyası qorantamızğa daa bir aza qoşuldı. Onıñ içün, türkşınaslıq kafedrasında bayram teşkil etmege qarar aldıq», – dep añlattı Qırım.Aqiqatqa Şevçenko adına KMU türkşınaslıq kafedrasınıñ assistenti Olga Pışneha.

Aytqanına köre, teşkilâtçılarnıñ esas maqsadı Kiyev sakinlerine qolay ve añlayışlı şekilde türkiy halqlar aqqında malümatnen paylaşmaq edi. Ukrainlilerniñ qomşu halqlarnıñ adetlerinen tanış oluvı çeşit millet vekilleri arasında munasebetlerni pekitmege yardım eter, deyler.

Türkiy tiller Aftasınıñ yekünlevi çerçivesinde qırımtatarlarnıñ medeniyetine büyük diqqat ayırdı. KMU-niñ ocaları seyirciler içün ustalıq derslerini numayış ettiler: çiberek ve samsa azırladılar. Kontsertte yırcılar Lenmar, Lenara Osmanova çıqışta bulundılar, qırımtatar halq oyunlarınıñ ocası Elnara Abdullayeva oyun töşedi.

Programmanıñ bir qısımını KMU «qırımtatar filologiyası» bölüginiñ talebleri azırladılar.

Shatur Gudur gruppası kontsertniñ soñunda çıqışta bulundı, bu gruppa etno-pank usulında icra ete. Taqım azaları Müslim Ümerov ve Cemil Mamutov qırımtatar tilinde yırlap, öz icadında milliy unsurlarnı işleteler.

«Bu oquv yılında men Tavriya milliy universitetinden mında avuştım. Kafedramız türkiy tiller ve medeniyetler Aftasını teşkil etkenini eşitken soñ, mıtlaqa iştirak etmege qarar aldıq», – dey Shatur Gudur azası Müslim Ümerov.

Kontsert ve yemek numayışlarından gayrı, «Urum tili ve medeniyeti» mevzusında lektsiya oquldı. Musafirlerge Donetsk, Zaporojye, Qırımda yaşağan türkiy tillerden birinde laqırdı etken urumlar aqqında ikâye ettiler.

XS
SM
MD
LG