Link açıqlığı

Qırımtatarlarnıñ lideri, Ukraina prezidentiniñ qırımtatar halqınıñ işleri boyunca vekâletlisi, «Petro Poroşenkonıñ Bloku» firqasınıñ vekili Mustafa Cemilev Ukraina Baş prokuraturasına muracaatta bulunıp, Rusiye Federatsiyası tarafına keçken 387 Qırım arbiyine qarşı cinaiy iş açmasını istedi.

Bu aqqında o Golos Amerika neşirine bildirdi.

Cemilevniñ aytqanına köre, mında içki işelr organları, prokuratura, Qırım «Nazirler şurasınıñ» azaları aqqında laf kete. Cemilevniñ zanınca, olar Ukraina qanunlarına binaen, devlet topraq bütünligine ketirgen zarar ve zorbalıq üzerinden akimiyet deñiştirmek ıntıluvlarından sebep cinaiy mesülietke çekilmeli.

«Taqiqat işleri yapılmalı, olarnı sorğuğa çekmek kerek. Bunıñ kibi çağıruv üç kere olsa – mence, olar kelmeycekler – olarnı halqara qıdıruvğa ilân eteler, ve olarnıñ malümatları İnterpolğa berile. Olarnı qıdıruvğa ilân eterler, ve olar Rusiyeden tış başqa bir yerde olsalar, olarnı yaqalamaq kerekler», – dep qayd etti Cemilev.

Aprel ayında Rusiye akimiyeti Cemilevge işğal etilgen yarımadağa beş yıl devamında kelmege yasaq etti. Halq deputatınıñ imayesi bildirdi ki, Rusiye Federal migratsion hızmetine bu sebepten mahkeme davasını açtıracaq.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar

XS
SM
MD
LG