Link açıqlığı

Saatnıñ esas haberi

Ayaqmaşina qoşusınıñ işğali. Rusiye Qırımda ötkerilgen ukrain yarışlarnı saipleştirmege isteymi?


Kiyev – Rusiye ayaqmaşina sportı Birligi, yarımadada 2013 senesinden başlap ötkerilgen FreeRate DH yarışlarını keçirecegini bildirdi. Yarışlarnı ötkermek içün ariza endi Halqara ayaqmaşina aydavcıları birligi tarafından qayd etildi. Ukraina ayaqmaşina sportı Birliginde ( USI) rusiyeli zenaatdaşlarını ayın-oyunlarda qabaatladılar ve ukrain yarışlarını saipleştirdiler, dep ayttılar. Bunen beraber Qırım qoşularını 2015 senesi taqviminden alıp taşlamağa çağırdılar.

Bir yıl evelsi Yaltada birinci kere dağlardan eñüv büonca birinci qoşu ötkerilgen edi. Yarışnı sport sevdaları ve Ukraina ayaqmaşina sportı Birligi azırladılar. Bunı brifing devamında Ukraina ayaqmaşina sportı Birliginiñ reisi (UASB) Bоris İvanov bildirdi.

«Şu vaqıt bu sport çeşiti asılında inkişaf etmey edi. Teşkiliy meselelerni yaltalı mühlisler ve men öz boynumızğa aldıq. Birlikte vesiqalarnı azırladıq ve yerli akimiyetnen muzakereler alıp bardıq», – dedi o.

İvanov aytqanı kibi, FreeRate DH eki yıl devamında ötkerilip, büyük alğışlarğa nail oldı.

Rusiye yarımadanı işğal etken soñ, professional ayaqmaşinacılar arasında munasebetler deñişti. Qırımlılar öz birlikni teşkil ettiler ve bu birlik Rusiye ayaqmaşina sportı Birligine kirdi.

Qırımnı Tula vilâyetinen «qarıştırdılar»

Ukraina ayaqmaşina sportı Birligi prezidenti qayd etkeni kibi, «referendumdan» soñ, FreeRate DH teşkilâtçıları onıñnen 2015 senesi yarışlarnıñ ötkerilüvini muzakere ettiler, amma, o yardım etmege red etti.

«Biz bu yarışqa arizanı berip olamaymız. Biz onı keçirecek kibi olsaq, demek birligimiz bunıñ kefili olmalı. Amma, biz anda bir kimse baracağını kefil etip olamaz edik, çünki demir yol naqliyesi, uçaqlar keregi kibi çalışmaylar. Anda bir kimse barmağa istemez ve barıp ta olamaz», – dedi İvanov.

İvanov qayd etkeni kibi, yarışlar boyunca muzakerelerni devam ettirmek yerine, Rusiye zenaatdaşları kendi başına yarışnı ötkermege qarar aldılar, ve atta arizanı qayd ettiler. Amma, bunı yapmağa aqqı yoq edi, çünki bütün vesiqalar Ukrainağa ait. UCI buña qulaq asmayıp, yarışlarnı taqvimge kirsetti, teşkilâtçılar olaraq Rusiyeni belgiledi.

«Yarış endi ukrain degil de, rusiyeli oldı. Bu bir qaç sebepten yañlıştır. Birinciden, Rusiyede vesiqalar azırlanmadı. Ekinciden, Qırım halqara cemaatçılığı tarafından Rusiye topraqları kibi qabul etilmey. Onıñ içün, Qırımda sport yarışları Rusiyeli bayraqlar altında keçirilmez», – dep ayttı Race Horizon Park yarışlarınıñ matbuat-kâtibi Natalya Krsnenkova.

Ukraina ayaqmaşina sportı Birligi rusiyeli zenaatdaşları leyhanı saipleştirgenleri içün, ayaqmaşinacılar halqara Birligine mektüp yollap, hatanı tüzetmege rica ettiler.

Ukrain sportçılarnıñ fikirince, Qırım ayaqmaşinacılar birligi aynecilik yaptı, arizada yarışlar Yalta şeerinde ötkerilecegi aqqında aytıla, amma, bu Qırım şeeri olğanı bildirilmey. Bunı Kiyev sport birlikleri Şurasınıñ icra müdiri Denis Şoludko bildirdi.

«Rusiye Birligi, yarışnı ötkermek içün arizanı bergende, Yalta şeerini qayd etti, bu kibi şeer Tula vilâyetinde de bar. UCI añlamayıp, razılıq berdi. Bizim maqsadımız, hatanı tüzetmektir. Amma, rusiyeliler bunı bilip, anecilik yaptılar», – dedi o.

Yarışnı qıtağa keçirmeliler

Denis Şoludkonıñ fikirince, rusiyeli sportçılar tek ayın-oyunlar yapmaq degil de, ayaqmaşinacılar halqara Birliginiñ qaidelerini bozdı.

Ukraina sportçıları yarımadada halqara yarışlarnıñ keçirilüvine qarşı çıqalar, amma, onıñ qıtağa keçirilüvine karşı degiller.

«Ayaqmaşinacılar leyhasını teşviq etmek içün biz imkânlar taparmız. Zakarpatye, ya da Bukovelde teşkil etmek mümkün. Qırımda ise, ayamaşina yarşları ötkerilmeycek. Qırımlılar anda ne olıp keçkenini daa añlamadılar. Anda, rusiyeli arbiy bazasından ğayrı, iç bir şey olmaycak»,– dep ayttı Ukraina ayaqmaşina sportı Birliginiñ reis muavini Aleksandr Başenko.

Ukraina sportçıları aytqanı kibi, olar endi UCI-ge mektüp yolladılar. Şimdiki vaqıtta ayaqmaşinacılar halqara Birligi bu meseleni ögrenip, cevap azırlay.

Qırım sportçıları şimdiki vaqıtta izaatlar bermeyler. FreeRate DH yarışınıñ Qırımdaki teşkilâtçısı Оlga Pernatskaya Qırım.Aqiqatqa aytqanı kibi, oktâbrniñ 29-nda teşkilât azaları toplaşıp, olğan vaziyetni muzakere etecekler, bundan soñ, kendi mevamını aydınlatacaqlar.

XS
SM
MD
LG