Aqmescit – Geniçesk rayon memuriyetiniñ sabıq reisi Seytumer Nimetullayev rusiyeli Qırımda faal areket ete ve ukrain qoruyıcı organlarınıñ diqqatını celp etti. Sabıq memurğa, şimdi ise, «Qırım birligi» cemaat teşkilâtınıñ reberine qarşı Herson vilâyeti prokuraturası üç cinaiy iş açtı, İçki işler nazirligi ise onı qıdıruvğa ilân etti. Nimetullayev özü bütün qabaatlavlarnı red ete, bunı siyasiy sebeplerden yapılğan basqı dep saya.
Keçken aftanıñ soñunda Herson vilâyeti prokuratruası Geniçesk rayon memuriyetiniñ sabıq reisi Seytumer Nimetullayevge qarşı birden üç iş açtı. Sabıq memurnı öz vazifeni kendi menfaatlarında qullanğanında şekleyler. (Ukraina Cinaiy kodeksiniñ 364 maddesi, 2-nci qısımı). Hususan, mahkeme taqiqatçıları memur auktsion keçirmeyip, 1000 ga etrafında topraq arsasını şahsiy işhanege teslim etti, şu işhaneniñ müdiri onıñ apayıdır, dep bildireler. Böyle etip, devletke 7 million grivna etrafında zarar ketirildi.
Ekinci cinaiy iş emek qanunlarınıñ bozuluvınen bağlı.
«Mahkemeden evel yapılğan taqiqatnıñ malümatına köre, Geniçeskten Kiyevge eki kere mecburiy şekilde devlet işinde çalışqan 50 adamdan ibaret gruppa «antimaydanğa» yollanılğan edi. Şu yolculuqlarnıñ teşkilâtçıları Geniçesk rayon memuriyeti, Geniçesk rayon devlet şurası, ve Regionlar Firqasınıñ rayon merkezi oldı», – dep aytıla bildirmede.
Bundan da ğayrı, Nimetullayev İnternet vastasınen Ukrainanıñ devlet sıñırlarını deñiştirmek maqsadınen çağıruvlar yerleştirdi (110 madde 2-nci qısım). Prokuraturanıñ malümatına binaen, Nimetullayev bu kibi çağıruvlarnı «vaqtınca işğal etilgen Qırım Muhtar Cumhuriyeti sakinlerinen evelden añlaşıp», 2014 senesiniñ mayıs ayından başlap, şimdiki künge qadar yerleştire.
Oktâbr 17 künü sabıq rayon memuriyeti reisine, o cinaiy işniñ becergeninde şeklengeni aqqında bildirildi, oktâbr 22 künü Geniçesk rayon bölügi militsiyası Nimetullayev qıdırılğanını ilân etti. İnşaat, maşinaları, 700 ga meydanlıqta topraq arsaları apis etildi. Şeklengen memur şirketke ayırğan topraqlar devletke qaytarıldı.
Prokuraturada qayd etkenleri kibi, şimdiki vaqıtta şeklengenniñ bulunuv yerini belgilene.
Nimetullayev: «Biz ötmegimizni elâl qazandıq»
Qırım.Aqiqat Seytumer Nimetullayevge izaatlar içün muracaat etti. Nimetullayev bütün qabaatlavlarnı red ete. Onıñ fikirince, bütün bu işler mahsus yapılğan ve onıñ Qırımdaki faaliyetinen bağlı. Belli ki, Nimetullayev bir yıldan soñ, daa bir Qurultaynı çağırtacaq oldı. Şimdiki Qurultay, «Ukraina çerçivesinde çalışa, Rusiye Federatsiyasında ise, de-yüre faaliyet etip olamay».
«Bu cinaiy işler, menim cemaat faaliyetim, «Qırım birligi» areketiniñ reberi olğanım, adamlarnı Rusiye Federatsiyasında çalışmağa çağırğanım içün mahsus açıldı», – dey Nimetullayev. – Meni martnıñ 10-nda işten çıqardılar. Aprelde Ukraina mahsus hızmeti tarafından büyük bir teşkerüv ötkerildi (Geniçesk rayon devlet memuriyetinde. – Müel. qayd.), neticede bir şey tapmadılar. Ondan soñ, yañı Qurultaynı teşkil etmege qarar alğan soñ, taqiqatçılarnı taptılar. Sahte bir iş açmasalar, olarnı işten boşatırlar, dediler».
Qayd etmek kerek ki, 1000 ga köy hocalıq topraqlarnıñ ayırı şirketke teslim etilüvi boyunca da «bozuluvlar yoq». «Topraqnı kommunal hocalığına berdik, qanun boyunca o, topraqnı işlemege aqqı olğan diger hocalıqqa teslim etti. Bu topraqlarda şu hocalıq yigirmi yıldan ziyade çalışa», – dep añlattı sabıq memur. Aynı zamanda, topraq keçken şirketniñ saibi kerçekten de, apayı olğanını tasdiqladı. Nimetullayevniñ sözlerine köre, şimdi o «pek hasta», onıñ içün Ukrainanıñ qıtasında buluna.
Bunen beraber, o Ukrainanıñ devlet sıñırlarını deñiştirmek içün mahsus çağıruvlar yapqanını red ete: «Saçma bir şey. Men Ukrainanı sevem ve sevecem – amma, evelki Ukrainanı, faşist hıntası idare etken, halq vekilleri öldürilgen, çöplük qutularına atılğan Ukrainanı degil». Sabıq memur emin, onı qıdırğanları tek nufuzını kötercek.
Umumen alğanda, Ukraina qoruyıcı organlarınıñ oña ayırğan diqqatını Nimetullayev «Meclis reberleriniñ sımarışı» ile añlata. «Olar halqqa hainlik yaptılar ve bugünde bugün Ukrainada bulunalar. Allah er şeyni köre», – dedi Nimetullayev.
Aynı zamanda, Rusiye Federatsiyası «olar (Ukraina halq vekili Mustafa Cemilev ve Meclis reisi Refat Çubarov) yapqan cinayetlerni aydınlatmağa aşıqmağanları» sebebinden çorlana. «Ekisiniñ de birer qabaatlav cıltı bar. Men bunı öz közlerimnen kördim», – dedi Nimetullayev.
Qayd etkeni kibi, yaqın kelecekte matbuat-konferentsiyasını ötkerip, oña qarşı açılğan cinaiy i şve qıdıruv boyunca izaatlar berecek. Bundan da ğayrı, Rusiye Federatsiyası Tış işler Nazirligine yardım içün muracaat etecegini ayttı. «Rusiye vatandaşı olaraq, meni Ukrainadaki aqsızlıqlardan qurtarmağa kerekler, – dey sabıq memur. – Belki olarda (Ukrainada. – Müel. qaydl.) iqtisadiy vaziyet kergin olğanı içün, endi menim mülkümni de 1944 senesi olğanı kibi saipleştirmege isteyler. Biz ötmegimizni elâl qazandıq, bütün vesiqalarımız bar».
Ukrainağa barıp, taqiqatçılarğa tfsir bermege azırsıñızmı, degen sualge: «Meni apis etip, ve apishanege qapatmaları içün anda barmağa deli degilim».
«Yardım etiñiz, qorçalañız, men qırımtatarım da»
Meclis reisi Nimetullayevniñ aytqanlarına teñqidnen yanaştı. Refat Çubarov, raqipniñ cinaiy işler «Meclis reberleriniñ sımarışı» ile açılğanını «Nimetullayevniñ hasta hayalları ve yañı saiplerini yımşatmağa isteginen añlattı».
«Onıñ, evelki Ukrainanı sevdim ve sevecem» kibi sözleri meni şaşırttı, – dedi Çubarov Qırım.Aqiqatqa. – Elbette, Nimetullayev Yanukoviç zamanına ait Ukrainanı sevgeni añlaşıla, çünki Yanukoviç zamanında aqsızlıqlarğa daimiy sürette berilgen qaparlar sayesinde köz yumula edi. Kiyevde yüksek vazifelerde bulunğanlar, halqqa qarşı yapqan cinayetler içün qorqıp, qaçqan soñ, Nimetullayev birden Qırımğa yol aldı, çünki anda şimdilik mahkeme yetip olamay. Faqat, mında da bir kimsege kerek olmağanı belli oldı. Tek bir kerelik qullandılar, o da keçiçici müddette».
Bundan da ğayrı, Meclis reisi dört yıl evelsi yüz bergen vaqianı hatırladı. «2010 senesi Nimetullayevni qoruyıcı organları endi yaqasından tutqan ediler, birinci kere Mecliske çapıp kelgen edi: yardım etiñiz, qorçalañız, men qırımtatarım da. O vaqıt, Meclis qırsız ve qapar bericilerni qorumağanını çoq añlattıq. Soñra, kene Kiyevge yol tapıp, «qoranta» ögünde tiz çökti ve yañı faaliyetke izin aldı».
«Qırım Birligi» reisiniñ başqa delilleri aqqında Çubarov şöyle dedi: «Öz hainligini aqlamaq içün er hain biñ türlü mana tapar». Alman yazıcınıñ bu sözleri Nimetullayevni eñ güzel sürette añlata. O, kendi qorqaqlığını ve satqınlığını başqasınıñ boynuna asmağa istey».
Qayd etmeli ki, bu yılnıñ mart ayında Ukraina İçki işler nazirligi cumhuriyetniñ birinci şahıslarnı qıdırğanını ilân etti. Bu cümleden, Sergey Aksönov, Vladimir Konstantinov, Rustam Temirgaliyev ve Natalya Poklonskaya.
