Link açıqlığı

«Qırım birligi» bir yıl soñra yañı Qurultaynı saylaycaq ola


«Qırım birligi» cemaat teşkilâtı kelecek sene oktâbr ayına qadar yañı Qırımtatar Milliy Qurultayınıñ delegatlarını saylamağa niyetlene.

Bu aqqında teşkilât reisi Seytumer Nimetullayev Aqmescitte matbuat konferentsiyasında bildiri, dep haber ete e-Krım.

Onıñ fikirince, Qırımda qırımtatarlarnıñ menfaatlarını temsil etecek yañı organnı meydanğa ketirmek kerek.

«Qırım birligi» Qırımda Qurultay saylavlarını keçirecek. Biz maqsadımızğa irişmege tırışacaqmız, çünki bugünde-bugün qırımtatar halqına Rusiye Federatsiyası ile iş tutacaq yañı Meclis ve Qurultay lâzim. Bar olğan Qurultayğa qarşı degilmiz, lâkin qırımtatarlarnıñ 99 fayızı o saylavlarda iştirak etmedi», – dedi Nimetullayev.

Teşkilât reisi bergen malümatqa köre, ealini cedvelge aluv neticeleri aydınlatılğan soñ, Qurultay saylavlarına azırlıq körip başlaycaqlar. Oña köre delegatlar sayısı belgilenecek. Saylavlar sisteması daa belgilenmedi, lâkin teşkilât bu mevzuda «ükümetten» yardım isteycek ola.

Yañı Qurultay endi bar olğan Qurultaynen parallel olacaqtır. «Qırım birligi» yañı organ yañı ad taşıycağını red etmey.

Keçken sene baarde Qırımda Qurultay delegatlarınıñ umumiy, doğru saylav aqlarınıñ gizli rey berüv esasında saylavları keçirildi. Saylavlarda qırımtatarlar ve olarnıñ aile azaları iştirak ettiler. Umumen 250 delegat saylandı.

«Qırım birligi» teşkilâtı Rusiyeniñ Qırım işğalinden soñ meydanğa ketirildi. Közeticilerniñ zanınca, bu teşkilâtnı Qırımtatar Milliy Meclisiniñ alternativası olaraq köre ediler.

Qırımtatar halqınıñ lideri Mustafa Cemilev Qırım.Aqiqat saytına aytqanına köre, «Qırım birligi» kibi teşkilâtlar çöplük qutusında olacaqlar».

Mecliste bunıñ kibi areketlerniñ meydanğa ketirilmesini qırımtatar halqınıñ milliy idare organları – Meclis ve Qurultaynıñ – alternativanı şekillendirmek maqsadı olaraq tanıylar.

XS
SM
MD
LG